Di angay debatehan kinsay sad-an sa 2 ka barko – Rama

CEBU, Philippines - Gisanta  ni  Mayor  Michael  Rama ang  mga  debate  bahin  sa kung  kinsay  sad-an  sa duha  ka  mga  barko  nga  nagkabangga    didto  sa kadagatan  sa dakbayan  sa  Talisay  sa miaging  Biyernes  sa  gabii.

Si  Rama  kinsa  usa  sa  mga  dinapit  sa   awards night  sa  Ten  Outstanding Cebuano  Awards (TOCA)  didto  sa Sacred Heart  Center  sa dalan  D. Jakosalem  sa  miaging  Sabado  sa gabii,  nagkanayon  nga unya  na  ang  debate  sa korte  kun   masulbad na  ang  problema  bahin  sa rescue  operation.

Si  Rama  kinsa  wa  pa  kaayo  makapahuway  tungod  sa pagtukaw  pag-atiman  ug  pagmonitor  sa kalambuan  sa  rescue  operation,  miingon  nga  kun  silang  mga  opisyal  sa kagamhanan nagkahiusa  sa pagtinabangay aron  maluwas  ang  mga  kinabuhi  nga  nadala  sa barko  sa ilawom  sa dagat, angay  usab  unta  nga  makighiusa  kanila ang  katawhang  Sugboanon.

Kini  tungod  kay  matud  sa mayor    ang  laing  suliran  nga atubangon  sa  mga  mananagat  nga  Sugboanon  mao  ang  oil  spill  human  sa  mga  rescue  operation.  Iyang  giangkon  nga  kauban  nila  nga way  tulog  niadtong  Sabado  sa gabii  mao  si  Gobernador  Helario  Davide  III  ug  ang  mayor  sa dakbayan  sa Talisay  nga  si Johny V. delos  Reyes. Samtang  si  Gobernador  Davide  sa  iyang  bahin  sa  iyang  pagpamulong sa maong  tulumanon,  nagkanayon  nga  usa  sa  mga  dagkong  hitabo  nga  nasugatan  nila  ang  maong trahedya sa kadagatan.

Matud  niya  nga  ingon  niini  ang   bation  sa   usa  ka  lider  nga  di  makatulog  samtang  may  mga  dagkong hamok  sa  kinabuhi  nga  mosungog  sa  ilang     mga  sakop.

Apan  didto  usab  niya  masukod  ang  kalumo  sa kasingkasing  sa  mga  Sugboanon  sa pagtunol  sa ilang  mga  hinabang  sa  mga  nabiktima  sa pagkalunod  sa St. Anthony de Aquinas.

Matud  niya  nga  dili lamang  pagkaon  ang  giandam  kundi  mga  senina, habol  ug  kutob  sa panginahanglan  sa mga  na-rescue  nga  mga  pasahero.

 Nasuta  usab  ni Davide  ang  pakighiusa  sa uban  sa  ilang  mga  rescue  operation  aron  masalbar  ang  daghang  kinabuhi.

Ang  ilang  gihangyo  sa  mga  Sugboanon  nga  unta  tabangan  sila  og  ampo  nga  daghan  ang  masalbar  sa maong  hitabo. (BANAT NEWS)