Krudo ug gasolina sigurohon sa supplemental budget

CEBU, Philippines - Ang gastohan sa pagpalit og krudo ug gasolina alang sa mga sakyanan ingon man heavy equipment sa Cebu City Hall maoy siguroon sa paggahin og pundo sa supplemental budget nga gusto nga iduso ni Mayor Michael Rama sa City Council.

Matud ni City Administrator Jose Marie Poblete nga ang rason niini mao nga gamay pa ang salapi nga ilang nakit-an nga mahimong magamit alang sa Supplemental Budget No. 2.

Ang hepe sa General Services Office (GSO) nga si Rolando Ardoza misugyot og P45 milyones nga dugang budget alang sa pagpalit og fuel kay ang gasolina ug krudo sa City Hall mahurot na sa buwan sa Septiyembre.

Ang laing gastohan nga giisip nga “priority” mao ang mga P40 milyones nga gahin aron ibayad sa pribado nga labayanan og mga basura sa dakbayan diha sa Consolacion. Ang dakbayan molabay og mga 300 toneladas nga basura matag adlaw nga bayran  og P700 kada tonelada, ug mga trak nga giabangan sa siyudad sa paghakot niini.

Hinoon matud  ni Poblete nga miabot na og kapin sa P200 milyones ang kwarta nga nakit-an nila nga magamit sa Supplemental Budget ug paabuton na lang nila ang  desisyon sa konseho.( /EIM) (BANAT NEWS)