Dul-ang P50 mil nga alahas gisakiyo sa mga kawatan

CEBU, Philippines - Dul-ang P50,000  ang kantidad  sa mga alahas  ang nasakiyo  sa wala  hiilhing  mga  kawatan  sa pagpanglungkab  nga nahitabo  sa managlahing  lugar  ning  siyudad  kagahapon  sa buntag.

Una  niini ang  usa  ka  iladong pawnshop nga nahimutang  sa P. Del Rosario St. sa  Brgy. San Antonio niining  dakbayan   sa Sugbo  kagahapon  sa  buntag.

Base sa imbestigasyon sa kapolisan duha ka wala  hiilhing  mga  tawo  kinsa  nagbukot  sa  dagway  og  panapton  maoy nakita sa CCTV camera sa maong establisemento .

Ang  maong  mga  kawatan  misulod sa entrance door ug misaka sa ikaduhang andana  agi sa hagdanan sa building ug  giabli  pagpugos  niini ang grill door sa opisina  sa maong pawnshop.

Nakuha sa mga tulisan ang usa ka Nokia Asha 200 nga nagkantidad   og  P5,000,  Nokia C1 nga nagkantidad og P2,000  ug duha ka gold bracelet nga mobalor  og P7,000, nga  gipanag-iya  ni Dr. Marivic Alcantara.

Samtang  didto sa Brgy. Kamputhaw sa  alas 10:00 sa buntag kagahapon  gilungkab  na  usab  ang  pinuy-anan   ni Julia Alibon, 77 , byuda   nga  nagpuyo sa Door 6 Zomer Home, Escario St. dakbayan sa Sugbo.

Sa pakighinabi sa Banat News sa biktima, kini nagkanayon nga wala siya sa apartment  niadtong higayona ug  ang katabang lang   maoy  nahabilin.

Apan  milakaw  ang  maong  katabang  kay  nagkuha sa apo sa biktima  sa  eskuylahan  niini.

Sa pagbalik  sa katabang  sa ilang  apartment   naabtan nga  abli  na ang pultahan sa apartment ug  ang kwarto sa  biktima.

Didto  sa sulod  gipamuksan  usab  ang  mga  aparador  sa biktima  ug gikawat ang mga alahas   nga mikantidad  og P31,000.

Padayon  pang  giimbistigar  sa kapolisan  ang  maong  mga  hitabo. (BANAT NEWS)