NBT ug SBT naghigpit sa seguridad

CEBU, Philippines - Duha ka mga dagkong terminals sa bus dinhi sa siyudad sa Sugbu naghigpit sa ilang seguridad nunot sa nahitabong mga pagpamomba didto sa Mindanao.

Daan nang giklaro sa kapolisan nga walay kamatuoran ang report nga nanggawas bahin sa kinse ka mga teroristang mamomba dinhi sa Sugbu apan gipasalig nilang kanunay ang pag-monitor sa kapolisan sa tanang mga intelligence reports may labot ang seguridad.

Sa pakighinabi sa Banat Manobela kang Carmen Quijano, ang tagdumala sa South Bus Terminal, mipadayag kini nga ang ilang operation officer nga si Louie Madrigal mipadayag nga hugtanon kaayo nga mipatuman sa saktong seguridad sa terminal.

Matud pa ni Quijano nga nag-request gyud sila ug sa kapolisan gikan sa Cebu Provincial Police Office og mga sakop sa Special Weapons and Tactics nga kanunay’ng mag-inspeksyon sa terminal.

Dugang pa ni Quijano nga ang dul-an 20 ka mga Close Circuit Television (CCTV) Camera nga gipakatap sa terminal giingong pun-an pa kini aron gyud sa tanang dapit makita na sa CCTV monitoring.

Ang mga gwardiya nga magbantay sa entrance ug exit adunay metal detectors.  Gipahimangnoan usab sa kadagkuan sa terminal ang tanang dispatser, konduktor ug drayber nga kanunayon  pagsusi ang ilang sakyanan. Pahimangno ni Quijano sa publiko nga unta magmabinantayon usab kini ug dili lang magsalig sa awtoridad. Ang hepe sa kapolisan sa CCPO, Sr. Supt.  Noli Romana, mipadayag usab nga padayun silang nag-monitor sa tanang establisemento ilabi na sa mga malls, ports, airports, bus terminal ug simbahan nga kasagarang tapokanan sa katawhan.          

Samtang gipahibalo ni  Zosimo Jumao-as, chairman sa Cebu Provincial Bus Operator’s and Multipurpose Cooperative (CPBOMC) nga mao usab ang manager sa North Bus Terminal nga nahinabi sa Banat Manobela nga gihugtan usab nila ang ilang seguridad.

Sa pagkakaron, usa na lang ka entrance ang giablihan sa North Bus  Terminal aron mas sayon pag-monitor sa mga gwardiya ang mga pasahero. Gawas sa mga gwardiyang adunay metal detectors, duna say mga polis gikan sa Presinto 2 sa Mandaue City Police Office ang gidestino aron magbantay 24-oras.

Lakip sa giawhag ni Jumao-as pagtabang sa pagpaniid mao ang mga drayber ug mga konduktor lakip na ang mga nanginabuhi palibot sa terminal sama sa mga vendors ug dispatchers. (BANAT NEWS)