21B route drivers buot makabiyahe sulod sa Cebu City

CEBU, Philippines - Mga drayber ug passenger jeepney nga nagdala sa rota 21-B ug nagpanawan sa Mandaue paingon dinhi sa dakbayan mihangyo ni Mayor Michael Rama nga tugotan unta sila nga makapamasahero dinhi sa kadalanan sa siyudad bisan panahon lang sa gabii.

Pagkakaron wala na tuguti ang maong mga jeepneys nga gikan sa mga kasikbit nga lungsod ug dakbayan sa Sugbo nga makapamasahero sa mga karsada dinhi sa siyudad aron dili sila makatampo sa problema sa trapiko.

Gilatid sa ordinansa sa dakbayan sa Sugbo nga ang maong mga PUJ nga nagbiyahe sa mga silingan nga dapit sama sa Lapulapu, Mandaue, Consolacion, Talisay, Minglanilla ug uban pa – anha ra sila kutob sa mga accredited terminals.

Ang City Ordinance 2072 naglatid nga kadtong mga PUJ nga masakpan nga dili motuman sa ordinansa tanggungon ug i-release lang kun ang tag-iya makabayad sa tanang nagtumpi-tumpi niini nga multahan nga nalista sa Traffic Violations Bureau.

Ang 23 ka drayber nga miangkon nga naghulma sila og grupo nga gitawag og Mandaue Night Drivers and Operators Association miadto sa City Hall kagahapon aron mohangyo unta ni Rama.

Bisan og wala sila makaatubang sa mayor, apan ang mga drayber nagbilin og kopya sa ilang inandam nga suwat nga gipirmahan  ni Leonides Tapilot nga maoy ilang presidente sa grupo.

Matud ni Tapilot nga malipay na lang sila kun tugotan sa mayor nga makasulod sila gikan lang sa alas-9 sa gabii ngadto sa alas sayes sa buntag nga dili daghan ang sakyanan.

Adunay gibanabana nga mga 100 ka PUJ nga nagdala og rota nga 21-B, apan matud ni Guillermo Gelig nga vice president sa grupo nga mga 30 ra ka PUJ ang mamasahero panahon sa gabii. Ang bentaha kun tugotan sila mao nga kadtong mga pasahero nga taga dakbayan sa Sugbo ug atua magtrabaho sa Lapulapu ug Mandaue dili na kaayo mahasol kay dili na man magbalhin-balhin pagsakay.

Kining maong isyu gitugyan pa hinoon ngadto sa CITOM Board aron mahisgutan kun unsay ilang baruganan. (BANAT NEWS)