Ulitawo naghikog pinaagi sa cable wire

CEBU, Philippines - Napalgang  patay  nga  nagbitay   ang usa ka lalaki  pinaagi sa  cable wire  sulod  sa lawak  sa ilang  balay  sa   Sangi New Road, barangay Pajo, dakbayan sa Lapulapu sa miaging  gabii.

Si PO2 John Carlo Jocotan sa homicide section sa kapolisan sa maong dakbayan miila sa namatay nga mao si Serwin Ngujo, ulitawo, nga nagpuyo sa maong dapit. 

Matud pa ni PO2  Jocotan nga ang igsoong lalaki nga si Warren maoy unang nakakita  sa iyang igsoon  nga nagbitay  ug   gipahibalo  dayon  niini ang ilang amahan.

Dugang pa ni PO2 Jocotan   nga   ang  pamilya  sa naghikog  dali  nga  nangayo  og panabang sa ilang buhatan.

Human  nila  matangtang ang gihigot sa liog nga cable wire  ila  dayon  kining  gihatod ngadto sa Lapulapu City Hospital.

Ang mga doktor sa tambalanan  maoy  mideklarar   sa naghikog  nga patay na.

Si PO2 Jocotan miingon nga ang mga sakop sa pamilya wala  pa moluwat og pamahayag   bahin  sa posible nga hinungdan sa paghikog niini.

Hinuon si PO2 Jocotan miingon nga ilang gitambagan ang sakop sa pamilya  sa pagpaubos sa autopsy sa patay’ng lawas  niini   sa pagsuta sa  hinungdan sa  iyang  paghikog. (BANAT NEWS)