Pagtuok maoy namatyan sa gilugos — Dr. Bronia

CEBU, Philippines - Nasuta    nga  gituok  ang  19 anyos  nga  estudyante  sa kolehiyo  kinsa  giingong  gilugos  ug  gipatay didto sa Sibonga,  hinungdan  sa  pagkamatay  niini.

Si Dr. Felino  Bronia  sa  PNP Crime  Laboratory 7  kinsa  mihiling  sa lawas  ni  Marygrace Superales, 19,  ug  maoy mipamatuod  niini.

Matud pa ni Bronia nga wala sila’y nakitang timailhan nga gipahimuslan ang biktima   kay  wala  magisi  ang  kinatawo  niini.  Apan wala usab isalikway ni Bronia ang posibilidad nga gipahimuslan ang biktima,   bisan pa man   kun wala siya’y nakitang   timailhan.

Hubo  ang ubos  nga  sapot  sa  biktima  nga  nakit-an  didto  sa crime  scene.

Dugang pa ni Bronia nga ang kagrabe sa pagtuok sa biktima maoy usa sa hinungdan nga kini namatay.

Samtang ang kapolisan sa lungsod sa Sibonga, padayon pa  nga nagsubay sa migawas nga huhongihong bahin  sa  responsable sa kamatayon sa biktima.

Gani, padayon pa ang hot pursuit operation   batok  sa tawo  nga  maoy  giingong  kriminal  kansang  ngalan  gipugngan  sa kapolisan.

Ang  maong  tawo  giingon  nga  napriso  na  kaniadto.

Kahinumdoman nga niadtong Biyernes sa buntag ang biktima napalgan   nga walay kinabuhi sulod sa iyang lawak sa Taloot, barangay Poblacion sa maong lungsod.

Gitabonan  kini  og   habol   ug  nasuta nga nagisi na ang sinena  ug ang pang-ubos nga sapot niini. WC (BANAT NEWS)