Dagkong imbornal gipanaod sa kanal sa Mandaue

CEBU, Philippines - Gisugdan na sa kagamhanan sa dakbayan sa Mandaue ang pagsulbad sa suliran sa baha pinaagi sa pagpalawom sa  mga kanal ug pagbutang usab og dagko nga mga imbornal.

Kini ang gipadayag ni Mandaue City Assistant Engineer Andres Suson nga nahinabi sa mga tigbalita.

Matud pa niya nga  may mga  nahuman  na  og  trabaho, may  nagpadayon, samtang  may  nahunong  gumikan  sa gagmay  nga kakulian.

Gipasabot ni Engineer Suson nga ang nag-unang hinungdan nga nahunong ang pagpanaod  sa  mga  imbornal   mao  ang  kagahi  sa ubang  mga  molupyo  sa  pagpahawa  sa  mga  dapit  nga  taoran  niini.

Dugang pa niya nga gitugyan nila sa ilang  legal nga buhatan sa kagamhanan sa dakbayan ang pagsulbad sa maong suliran pinaagi sa pagpasabot sa mga molupyo nga hingtungdan.

Si Engineer Suson miingon nga ang ilang buhatan nakig-alayon   usab sa buhatan sa Department of Public Works and Highways (DPWH) 7.

Kini  tungod  kay nagpadayon  usab  kini  sa pag-ayo  sa ubang  mga  national  road   nga  anaa  sa dakbayan.

Sa nasayran  gigahinan  sa DPWH7  og  P65 milyones  ang  drainage project sa dakbayan sa Mandaue nga  naglakip   sa  dalan sa M.C. Briones   gikan sa barangay Subangdaku  ug  J. P. Rizal sa barangay Basak.

Si Engineer Joshua Monsanto nga maoy chief of planning section sa DPWH7 miingon nga naglangkob sa upat ka kilometro nga dalan sa highway   nga  gitaoran   sa  mga  imbornal.

Hinuon  ang   drainage project  sa  daplin  sa  mga  national  road   gitakdang  ipatuman sa dili pa matapos ang  tuig 2013. (/WC) (BANAT NEWS)