Drug pusher nga bayong-bayong sikop

CEBU, Philippines - Nasikop  sa kapolisan ang usa ka  bayong-bayong    nga  drug  pusher  didto  sa sitio Centro sa barangay Labogon, dakbayan sa Mandaue   sa miaging  hapon.

Si Senior Inspector Wilson Abot, hepe sa kapolisan sa Presinto 3 sa Mandaue City Police Office (MCPO) nga nagbase sa barangay Basak maoy nangulo sa buy bust operation  sa  pagsikop  sa suspetsado.

Matud pa ni SPO2 Danilo Barita nga nahinabi sa  Banat News nga ilang nadawat ang taho gikan sa nagpakabana nga mga molupyo sa maong dapit kalabot sa  negosyo  sa maong  batan-on.

Dugang pa niya nga gihimo gilayon nila ang pagpaniid sa illegal   nga  negosyo  sa maong minor de edad nga milungtad   sa kapin sa usa ka semana hangtod nga  ilang nasuta nga positibo.

Si SPO2 Barita miingon nga usa sa ilang mga sakop maoy ilang gihimo   nga  police decoy nga maoy   mipalit og shabu  sa maong   suspek.

Dihang gitunol  ang  P200 sa  police decoy ngadto  sa suspetsado, gitunol   usab  niini ang usa ka pakete nga shabu   ug  dali kini nilang gisignit.

Nunot sa pagkasikop sa maong batan-on, girikisa   usab  kini  ug ilang nakuha ang dugang pa nga tulo ka pakete nga  shabu  nga  didto  sa bulsa  niini. (BANAT NEWS)