Trabahante naguroy sa barko patay

CEBU, Philippines - Usa ka kawani sa Tsuneishi Heavy Industries didto sa barangay Buanoy sa lungsod sa Balamban  ang nalumos human kini naguyod sa barko nga ilang gisuwayan pagpalutaw sa dagat niadtong Biyernes sa alas 9:00 sa buntag.

Ang namatay nga kawani mao si Arvin Consolacion,25, nagpuyo sa barangay Dumlog, Toledo City ug kawani sa maong kompaniya.

Matud ni PO1 Bernard Pitogo sa Balamban Police dihang nahinabi sa Banat News subay sa inisyal nga imbestigasyon gikan sa kauban niini sa trabaho nga si Nepumoceno Peralman, samtang gitestingan nila pagpalutaw ang barko gikutayan nila kini og cable wire sa rescue boat nga naka- standby niadtong tungura.

Apan dihang gipalutaw na ang barko ug gipaandar nagkaproblema ang koneksyon niini sa rescue boat ug wala na kini sa kontrol hinungdan nga naguyod sa barko.

Ang mga kaubanan niini daling naka-release sa ilang safety belt maong wala madala og kaguyod, apan ang safety belt ni Consolacion giingong wala mopukas maong naguyod kini sa barko.

Ang biktima giingong nadala padung sa dagat samtang giguyod sa nagdagan nga barko, patay na kini dihang nahaw-as sa dagat ug wala na madala pa sa tambalanan.

Ang patay’ng lawas sa maong kawani gitakda pang ipaubos sa autopsy. Walay mga opisyal sa maong kompanya ang mipagawas og opisyal nga pamahayag bahin sa maong aksidente. (BANAT NEWS)