CEBU, Philippines - Mga guba nga garbage trucks sa dakbayan sa Talisay ang posibleng ipa-job-out ang pagpaayo niini aron madali.
Kahinumduman nga si Edwin Nierves, hepe sa Ecological Solid Waste Management Collection and Transport mibutyag nga walay tarong nga garbage trucks karon ang siyudad sa Talisay maong apektado ang ilang pagpangolekta sa basura.
Ang siyudad dunay 12 ka mga garbage truck apan karon lima na lang ang nagdagan kay ang pito nagyaka na lang sa city motor pool.
Si Konsehal Antonio Bacaltos Jr., chairman sa committee on environment nagkanayon kini nga nagkaistorya na sila sa city administrator nga si John Yre De los Reyes kabahin sa maong problema. Gibutyag ni Bacaltos nga gipasusi sa city administrator kung pila ang magasto sa pagpa-repair sa maong mga trak.
Apan kahinumduman nga ang siyudad kaniadto gikwestiyon sa Commission on Audit kabahin sa pagpa-job out og paayo sa mga sakyanan sa siyudad nga unta duna man kini kaugalingon motor pool.
Sa laing bahin, si Bise Mayor Romeo Villarante nagkanayon kini nga ang siyudad walay mga empleyado nga mga automotives ug nasuhito sa pag-ayo og mga sakyanan . Kung motugot ang COA ipa-job-out na nila ang pagpaayo sa mga sakyanan ilabi na sa mga garbage trucks tungod kay dili pweding malangan ang pagpangolekta og mga basura. (BANAT NEWS)