NYC para sa mga batan-on, tiguwang ug baldado

CEBU, Philippines - Dili lang mga batan-on ang atimanon sa National Youth Commission (NYC) kun dili lakip  usab ang mga senior citizens ug kadtong mga baldado ang panglawas.

Ang Commission on Audit(COA) mibutyag nga ang NYC wala mogahin og pundo o kaha naghimo og mga programa alang sa senior citizens ug mga differently-abled persons.

“Neither did management integrate in their regular activities the welfare of less fortunate and elderly,” nagkanayun ang 2012 audit report.

 Matud pa sa COA nga ang NYC wala mosubay sa gimando sa General Appropriations Act sa 2012 nga nagmando sa tanang ahensiya sa gobyerno nga mopahigayon  og programa alang sa mga senior citizens ug mga differently-abled person pinaagi sa paggahin og labing gamay usa ka porsyento sa kinatibuk-ang budget.

 Sa tuig 2012, ang NYC adunay pundo nga P62 milyones ug may dugang pa nga P11 milyones ug wala magasto nga P1.6 milyones sa nangagi pang tuig.

 Ang Republic Act No. 8044 wala lang nagmugna sa National Youth Commission (NYC) niadtong Hulyo 25, 1994 apan nagtukod usab sa National Comprehensive and Coordinated Program on Youth Development.

Pormal nga naumol ang NYC niadtong Agosto 10, 1995.

 Ang balaud nausab sa usa ka Executive Order No. 274 niadtong Hulyo 25, 1987 nga nagtukod sa Office of the Presidential Council for Youth Affairs (PCYA).

 Ang NYC giisip nga usa ka autonomous agency sama sa usa ka ahensiya sa nasudnong gobyerno apan ubos sa Office of the President.

Kini gitahasan sa pagmugna sa mga programa sa gobyerno alang sa kabatan-onan. (BANAT NEWS)