CEBU, Philippines - Ang pagkasikop sa 19 ka ilegal nga mananagat sa isla sa Carnaza, lungsod sa Daanbantayan niadtong Huwebes maoy signal nga seryuso si Mayor Augusto “Itok†Corro sa paggukod sa maong kalihukan. Wala pay pormal nga natukod ni Corro ang Bantay Dagat Task Force apan iya na gitudlo si kanhi konsehal Reuel Corro nga kasamtangang mangulo sa operasyon nga niresulta sa pagkasikop sa 19 ka mga ilegal nga mananagat.
“We have not yet begun. Ato pang hingusgan ug palapdan ang atong fuerza batok sa illegal fishing aron mahatagan ug kasulbaran kining maong problema nga wala mahatagi og pagtagad sulod sa dugay nga panahon,†matud pang Corro. Magpatabang si Corro sa Kapitolyo nga mapalapdan pa ang maong operasyon ug magdugang og mga patrol boats aron mapadayon ang operasyon. “Ako mo-apelar ug mohangyo sa mga operators sa dagkong illegal nga panagatan nga dili na unta sila mosulod sa kadagatan sa Daanbantayan,†matud pang Corro. Gibanabanang moabot sa 250 kilos nga nagkalainlaing isda ang nasakmit ug mobalor og P20 mil gikan sa mga tripolante luwan sa barkong panagatan, RS2 Rudyard. Ang mga dinakpan mga molupyo sa kasikbit nga isla sa Bantayan ug lungsod sa San Remigio.
Ang chief of staff ni Corro nga si Rosanni Luche nibutyag nga karong adlawa dad-on ngadto sa Provincial Prosecutor’s Office sa Kapitolyo ang mga dinakpan aron ipahigayun ang inquest proceedings.
Ang mga dinakpan mag-atubang sa kasong kalapasan sa Section 90 sa RA 8550 kun Fisheries Code of the Philippines ingon man Municipal Ordinance No. 98-02 nga nagdili sa hulbot-hulbot nga matang sa panagat sa lugar. (BANAT NEWS)