JVR way kalibotan sa cease and desist order sa SRP

CEBU, Philippines - Ang mayor sa dakbayan sa Talisay nga si Johnny De los Reyes giingong wala mapahibawo sa giisyu nga cease and desist order sa pagpahunong sa construction sa warehouse diha sa South Road Property (SRP).

Kahinumduman nga sa milabay’ng adlaw si De los Reyes giingong nanghunaw kabahin sa pag-isyu sa city legal officer og cease and desist order.

Si Atty. Alfredo Sipalay nga nahinabi sa mga tigbalita kagahapon miangkon nga wala niya masultihi ang mayor kabahin sa cease and desist order ug giangkon niya kining iyahang sayop.

Apan matud ni Sipalay nga mga usa ka semana sa administrasyon ni De los Reyes naghisgot siya ug ang mayor sa maong problema.

Ang nahisgutang problema gitugyan na ni De los Reyes ngadto kang Sipalay apan matud sa city legal officer nga nakalimot siya og pahibawo sa mayor sa iyang pag-isyu og cease and desist order niadtong Martes sa hapon.

Hinuon ang maong problema nahuyo ra kini tungod kay wala isipa sa mayor nga usa kini ka “big deal”.

Sa laing bahin, ang kagamhanan sa dakbayan sa Talisay mouyon sa bisan unsa nga paagi nga kasabutan tali sa dakbayan sa Sugbo alang sa kasulbaran sa problema diha sa luna sa SRP nga gitukoran karon og ware house.

Ang maong luna giingong napatitulohan na kini sa dakbayan sa Sugbo apan matud ni Sipalay nga dili sila mangangkon sa maong luna apan bisan unsa nga development niini kinahanglan nga mobayad sila og buhis ngadto sa Talisay tungod kay ubos kini sa teritoryo sa siyudad.

Gibutyag usab ni Sipalay nga ang kagamhanan sa dakbayan sa Sugbo mipatawag kini og tigom sa Talisay sa sunod semana aron matuki ang maong problema.

Sa laing bahin, si Cebu City Attorney Jerome Castillo nagkanayon kini nga lig-on sila sa ilang baroganan ug dili makapahunong ang siyudad sa Talisay sa gipahigayong construction diha sa nahisgutang luna.

Gibasehan ni Castillo ang Presidential Decree 1818 nga nagkanayon “prohibiting courts from issuing restraining orders or preliminary injunctions in cases involving infrastructures and natural resources development projects of, and public utilities operated by the government.”

Si Sipalay kagahapon nagkanayon kini nga ang ilang hangyo mao nga dili lang una ipadayon ang construction diha sa luna samtang duna pay pagahimoong panagsabot tali sa duha ka siyudad.

Si Sipalay midugang nga kung dili mahusay ang problema sa ipahigayon unyang panagtagbo tali sa dakbayan sa Sugbo posibleng ang siyudad sa Talisay modangop na unya ngadto sa korte. (/EIM) (BANAT NEWS)