Duha nasakpang nanuyop og shabu

CEBU, Philippines - Duha ka mga lalaki ang gidakop sa kapulisan human masakpi sa akto nga nanuyop og shabu sud sa usa ka payag sa Sityo Tiber, Poblacion Ward One sa lungsod sa Minglanilla niadtong Martes sa alas 4:45 sa hapon.

Ang nadakpan mao sila si Glenn Aniel, 25-anyos, taga barangay Calajoan ug Walter Codera, 37-anyos, taga barangay Tulay, Minglanilla.

Matud ni PO2 Nikki Carlo Plarisan, desk officer sa Minglanilla Police dihang nahinabi sa Banat News dunay mitawag kanila nga concerned citizen nga nagpahibalong dunay duha ka lalaking nanuyop diha sa usa ka payag sa ilang lugar.

Ang duha naaktuhan gyud nga nagdakopdakop sa aso ug wala na makadagan pag-abot sa mga polis.

Nakuha gikan sa duha ang usa ka paketeng may sulod nga gituohang shabu ug mga kagamitan sa paghingos niini, ang duha gipaslak na sa prisohan samtang gihikay ang kasong ipasaka batok nila. (BANAT NEWS)