Kadudahang transaksiyon sa daang administrasyon giiksamen

CEBU, Philippines - Ang bag-ong administrasyon sa dakbayan sa Talisay higpit  nga mieksamin sa tanang mga transaksiyon sa milabay pa  nga administrasyon tungod  kay adunay mga transaksiyon nga giingong kadudahan.

Ang maong mga transaksiyon naglangkob  sa pag-isyu og tseke sa mga balayranan.

Si Talisay City legal officer Alfredo Sipalay sa pakighinabi sa mga tigbalita nagkanayon nga aduna sila’y nabantayan nga transaksiyon nga wala’y klarong kontrata.

Usa niini mao ang suplay sa ink o tenta sa printer sa computer.  

Ang legal officer nahibulong nga ang mipirma sa kontrata mao lang   ang supplier   ug wala’y pirma sa siyudad.

Matud ni Sipalay nga dili sila magpataka og pirma sa mga tseke   kay  gawas kaniya,  bisan  ang city administrator ug ang legal assistant sa mayor motan-aw   usab niini.

Si Sipalay nahibulong usab  tungod kay  adunay mga kawani sa city hall kinsa  giingong  nangutang sa lending company ug ang pagbayad  ikaltas  sa ilang sweldo o salary deduction ug ang siyudad maoy mo-isyu og tseke niini. Matud ni Sipalay nga personal ang maong transaksiyon ug susihon usab niya kini tungod kay nakadawat sila og report nga giingong adunay Memorandum of Agreement (MOA) ang milabay’ng administrasyon ug ang maong lending firm.

Gipasabot ni Sipalay nga ang personal nga transaksiyon sa kawani,  iya  na  kini  sa maong  kawani  ug  siya  na  mismo  unta  ang muadto sa lending firm aron mobayad ug  dili kay sama sa gihimong collection agency ang siyudad.

Hinuon kadtong mga transaksiyon bahin sa PhilHealth, GSIS ug Pag-Ibig gipirmahan dayon nila kini.

Sa laing bahin, ang mga butang nga gidala ni kanhi Talisay City Administrator Richel Bacaltos ngadto sa bag-ong buhatan niya sa Talisay City State College posibleng i-formalize na ang donasyon niini, matud ni Sipalay. Si Bacaltos maoy officer-in-charge karon sa TCSC.

Matud ni Sipalay nga sa pagsusi nila  sa TCSC nakita nila ang tanang mga bag-o  ug daang  mga  butang  nga  gikan  sa  buhatan ni Bacaltos.

Gipasabot ni Sipalay nga gigamit usab kini sa usa sa mga buhatan sa  gobiyerno  hinungdan nga posibleng i-formalize na lang sa bag-ong administrasyon ang pag-donar niini. (BANAT NEWS)