Senior citizens nakasabot ra sa siyudad–OSCA
CEBU, Philippines - Wala ra kaayo masagmuyo ang mga senior citizens nga nalangan ang paghatag kanila’g cash assistance gikan sa dakbayan sa Sugbo.
Ang mga senior citizens nga mag-anhaan sa Office of the Senior Citizens Affairs (OSCA) sa Cebu City Hall miingon nga nakasabot sila nga kuwang pa og kwarta ang dakbayan pagkakaron.
Ang OSCA mihimo unta og pasalig nga ang sunod nga pagpanghatag sa ilang tag P2,000 nga cash assistance himoon niining buwan sa Hulyo apan ang City Treasurer’s Office mitataw nga walay pundo nga kakuhaan sa maong budget.
Si Rolando “Dodong†Llaguno nga maoy hepe sa OSCA sa dakbayan sa Sugbo maayo hinoon nga mipasabot sa mga senior citizens nga bisan og nalangan ang paghatag sa ilang cash assistance apan madawat gihapon nila ang kuwang nga P6,000 hangtud sa Disyembre. Karong tuiga tag P10,000 na ang madawat sa mata’g usa ka senior kay gigahinan sila sa Cebu City Council og P600 milyones nga budget para sa ilang cash assistance.
Pagkakaron matud ni Llaguno nga miabot na og 60,000 ang tanang senior citizens nga narehistro dinhi sa dakbayan. Gituohan hinoon nga ang uban kanila atua ra nagpuyo sa ubang dapit sa nasud ug mouli ra dinhi kun panahon na sa tingkubra.
Atol sa pagpanghatag kaniadtong Maryo 25 ug 26, miabot g’yud og 2,526 ang mga senior nga wala makakuha sa ilang cash assistance kay wala dinhi sa dakbayan. (BANAT NEWS)
- Latest
