Purisima adunay tulo ka gipapiliang CCPO director kang Rama

CEBU, Philippines - Pabiling moserbisyo si Sr. Supt. Mariano Natuel Jr. isip hepe sa kapolisan sa dakbayan sa Sugbo   samtang padayon pa nga giproseso ang hangyo ni Mayor Michael Rama nga ilisan kini.

Matud pa ni Chief PNP Gen. Alan Purisima, nga sa miaging adlaw aduna na sila’y gipiliang tulo ka tawo nga papilian kang Rama isip direktor sa kapolisan sa dakbayan sa Sugbo. Wala mikompirmar si Purisima kun nalakip ba si Sr. Supt. Noli Romana sa listahan nga ilang iduso unya sa mayor. Apan giklaro ni Purisima nga ang tanang kalihukan sa kapolisan kanunay’ng mag-agi og proseso hinungdan bisan ang hangyo  sa mayor sa dakbayan mag-agi usab niini.

Gipasabot usab ni Purisima nga ang pagkahimo ni Natuel nga CCPO director atol sa election adunay kasayuran ang Comelec tungod kay niadtong higayona miagi man usab sila sa Comelec.

Si Rama wala mag-usab sa iyang baruganan pagpili kang Romana bisan girelibohan kini tungod sa kapakyas niini  pagsumpo sa ilegal nga sugal sa Negros Oriental Police Office dihang siya maoy acting provincial police director. (Lesley Caminade-Vestil/EIM) (BANAT NEWS)