Drayber sa traysikad nga midaog sa hantak gipatay

CEBU, Philippines - Naglunang sa dugo ug wala nay kinabuhi ang usa ka traysikad drayber human gipusil sa nagmotorsiklong lalaki pasado alas-2 kagahapon sa kaadlawon diha sa dalan Tabada sa barangay Mambaling ning dakbayan. Ang biktima nailhan nga si Arnel Maybanting, molupyo sa maong dapit kinsa nakaangkon og samad pinusilan sa iyang agtang human gipusil sa duha ka wala mailhing mga lalaki nga nagsakay og motorsiklo.

Sa pasiunang imbestigasyon sa kapolisan  nasayran nga ang biktima giingong miadto sa eskina sa maong dapit kay adunay paliton apan gisundan kini sa mamumuno ug gipaulanan og bala.

Matud pa nga human malup-og ug gibiyaan sa mamumuno nangayo og tabang ang biktima sa mga tawo apan gikatahong way niduol ug dihang naabot ang inahan nga si Alice Polistico misamot ang iyang kaguol nga bisan siya wala paduola sa iyang nagbuy-od nga anak.

Ang inahan sa biktima mibutyag nga nakabantay na siyang daw nag-merida na ang anak sa miaging adlaw apan wala lang siya magtagad tungod usab kay na-busy siya sa pagpangandam sa iyang paglarga sa gawas sa nasud.

Ang igsuon sa biktima nga si Diza Maybanting mipadayag usab nga sa iyang nasayran daghan og kontra ang iyang igsuon tungod sa batasan niining mahilig mangomedya.

Si PO1 Reoful Adalim sa Homicide Section,mipadayag usab nga sa nakuha nilang impormasyon nga ang biktima nalambigit sa illegal nga drugas. Gawas niini, gikatahong adunay nasuya sa biktima dihang nakadaog kini sa hantak og dul-an P5mil.

Ang kapolisan padayon pang nagsusi kung si kinsa ang mga tawong nakabingkil sa biktima. (Lesley Caminade-Vestil/EIM) (BANAT NEWS)