Milayat patay sa Mandaue-Mactan bridge wa ilhi

CEBU, Philippines - Patay nang nadala  sa tambalanan ang usa ka lalaki kinsa  milayat sa taytayan sa dakbayan sa Mandaue  kagahapon  sa buntag.

Samtang   laing patay’ng lawas ang  napalgan  usab  nga  naglutaw sa kadagatan   sa barangay  Looc,  dakbayan sa Lapulapu. Matud pa ni PO1 Cristito Raboy  sa Mandaue  City  Police  Office (MCPO)  nga  mga alas 2:40 kagahapon sa kaadlawon   nakit-an  sa  mga molupyo sa  Looc, Lapulapu City ang  tawo  nga  milayat  sa   first  Mandaue-Mactan bridge.

Pagtugpa  niini  sa dagat  nagkapa-kapa  unya  nawagtang  pipila ka  gutlo.

Sa pagresponde sa kapolisan mitunga ang patay’ng lawas sa usa ka lalaki nga gibana-bana nga  nagpangidaron  og  30  kapin, pution, nagsul-ob  og orange nga shortpants, naghukas ug adunay tattoo sa kalawasan.

Hangtod ning pagsuwat sa balita wala pay  nakaila  niini   samtang padayon  pa nga  gisusi  sa kapolisan kung unsay hinungdan sa pagpakamatay niini. Ila  usab  nga  giutingkay  pag-ayo  ang  lawas  kun  may  dinunggaban  o agi  ba  sa bala  nga  mga  samad

Usa ka abstract tattoo ang makita sa wala nga bukton sa biktima sukwahi  sa tattoo sa usa ka binilanggo, sumala  ni   PO1 Raboy. Samtang   wala pa  usab  hiilhi   sa kapolisan  ang usa ka patay’ng lawas sa usa ka lalaki nga napalgang patay nga naglutaw sa kadagatan sa Barangay  Looc,  dakbayan sa Lapulapu sa milabay’ng Domingo sa buntag.

Base sa nasuta sa kapolisan sa Lapulapu ang maong patay’ng lawas naglutaw  sa dagat  dapit  sa Keepel Shipyard nga wala nay kinabuhi.

Sa imbestigasyon ni PO3 Lydo Pinos sa kapolisan sa Lapulapu nga napalgan sa mga sakop sa Philippine Coast Guard (PCG) ang maong patay’ng lawas ug gitugyan kini ngadto sa kapolisan sa Homicide section sa dakbayan sa Lapulapu . Gihatud  usab  kini  sa kapolisan  ngadto  sa usa  ka funeral  parlor  sa maong  dakbayan   aron  masusi  kun  wala  bay  foul  play   ang  kamatayon  niini.

Si SN1 Gustavo Puzon sa PCG mipadayag nga usa ka pasahero sa ferryboat ang mitaho ngadto kanila sa maong patay’ng lawas sa usa ka tawo hinungdan  nga  ila  kining  giadto  dayon.

Gumikan niini miawhag ang kapolisan sa mga nawad-an og mga kabanay sa pagsusi sa maong mga patay’ng lawas nga napalgang patay sa kadagatan sa dakbayan sa Lapulapu ug Mandaue. (BANAT NEWS)