City Health nagkuwang og mga doktor ug nurses
CEBU, Philippines - Ang Cebu City Health department mosugyot og daku-daku nga budget para karong sunod tuig kay nagplano kini nga mo-hire og daghang doktor ug mga nurses.
Matud ni City Health Officer Stella Ygoña nga isugyot niya kang Mayor Michael Rama nga mo-hire sila og dugang 15 ka doktor aron idugang sa 25 ka doktor nga gidestino sa lainlaing kabarangayan.
Gipasabot ni Ygoña nga kun maka-hire sila og dugang 15 ka doktor ug mahimo na nga 40 ang tanang doktor sa City Health department, ang usa ka doktor tahasan na lang nga modumala og duha ka barangay.
Si Ygoña nagkanayon nga pagkakaron ang usa ka doktor magtabok-tabok sa tulo ka barangay tungod kay kuwang sila og mga mananambal nga makaalagad sa katawhan.
Gawas sa 15 ka dugang doktor, gusto ni Ygoña nga ang City Health department mo-hire usab og dugang lima ka nurses, 15 ka midwife, ug 15 usab ka sanitary health inspectors.
Sa ingon nga paagi matud ni Ygoña nga molambo ang ilang serbisyo ngadto sa katawhan. (Rene U. Borromeo/EIM) (BANAT NEWS)
- Latest
