Tiguwang napaig sa sud sa balay niyang nasunog

CEBU, Philippines - Napaig ang usa ka tigulang babaye  uban  sa naugdaw  nga  balay niini   didto  sa Purok 3, barangay Cubacub,  dakbayan sa Mandaue kagahapon  sa alas 12:45   sa kaadlawon.

Si SFO1 Cefriano Codilla, imbestigador sa Bureau of Fire Protection (BFP) sa maong dakbayan miila sa napaig  nga  si Maria Pino, 79, biyuda  nga nagpuyo sa maong dapit.

Dugang pa ni Codilla nga gitug-an sa mga anak niini nga ang ilang inahan kanunay   nga  mahubog ug magsinggit-singgit sa dili pa matulog nga maoy hinungdan nga gibutang kini nila sa laing balay.

Matud pa ni SFO1 Codilla nga walay kuryente ang balay nga gipuy-an sa biktima nga maoy hinungdan nga migamit lamang kini og lampara.

 Gituohang natumba ang  maong  suga nga maoy nakaingon sa pagkasunog sa gipuy-an niining  balay. Dugang pa niya  nga  naugdaw ang maong balay  sa sunog nga  nakontrolar   nila sulod sa 2 minutos. Ilang gipaubos sa second alarm ug ang kayo wala makatapon sa silingang   mga  balay   kay dali nilang gipasiritan  og tubig. Si SFO1 Codilla miingon nga naghayang ang maong biktima dihang ilang giugkat   gikan  sa naugdaw niining balay.

Gituohan usab  ni  Codilla  nga nahinanok   sa pagkatulog  ang  biktima dihang  miulbo  pagkalit ang  kayo  sa  iyang  pinuy-anan.

Gibana-bana  nga  mikabat  og  P10  mil ang  danyos  sa maong sunog, sumala  ni  Codilla. (BANAT NEWS)