Gonzales wa ma-interview sa Banat News

CEBU, Philippines - Wala ma-interview sa reporter ning  maong pamantalaan si manlalaban Ricardo Deen Gonzalez.

Kini  may  labot  sa balita  nga migawas sa Pahina 5 ning maong  pamantalaan  kaniadtong Disyembre 15, 2009  nga  nag-ulohan “Abogado gidakop sa kasong perjury”.

Ang maong  balita    naghisgot kang Atty. Ricardo Deen  Gonzales nga gibase  lang  sa reporter  sa Banat News  sa gipublikar sa mga  pamantalaan  sa  Manila  sama  sa  Filipino Star  Ngayon,  Journal Online ug  sa Abante Tonite  niadtong Disyembre 5, 2009.

Ang napublikar  nga  balita  sa Banat News  niadtong Disyembre 15, 2009, napulo  na ka adlaw  human  kini migawas  sa mga newspaper sa Manila, susama ra  sa  napublikar  sa nahisgutang  tulo  ka pamantalaan.  

Kun kining maong balita  gikutlo  sa reporter  sa Banat News  gikan  sa mga  pamantalaan  sa Manila, wala  kini  magpasabot  nga  dauton ang dungog ug pagkatawo ni Atty. Gonzales.

Usa  sa mga  hinungdan  nga  gisuwat  sa reporter  sa Banat News  ang  maong  balita  bahin kang  Atty. Gonzales  mao  nga tungod kay  nagtuo  kini nga tinuod  ang maong  report. Ikaduha,   tungod  kay  gikinahanglan usab  sa  pahina ang  national news  sa maong  higayon  ug  wala nay  laing  nakita  ang  reporter  nga ikatapak  sa maong  pahina  busa  gikutlo niini  ang maong  report  gikan  sa  Filipino Star Ngayon.

Apan  bahaw  na diay  ug  dili na  unta  angayan  pang  ikapublikar  tungod  kay  kaniadto  pang Disyembre 5, 2009   kini migawas, napulo na ka adlaw human mogawas   sa mga  pamantalaan  sa Metro Manila.

Tungod niini nangayo  og  pasaylo  ang pamantalaan kang Atty. Gonzales ug  iya  usab kining gidawat kay  iyang  nasabtan  ang  maong  hitabo. (BANAT NEWS)