TCPS ug Lifeguards sa Talisay nadismaya sa kahugawan ug wala’y disiplina sa publiko

CEBU, Philippines - Subling nanglimpyo sa kabaybayonan sa barangay Poblacion ang kapolisan ug grupo sa lifeguards sa dakbayan sa Talisay, apan kapolisan nadismaya kay ang publiko wala gihapoy pagpakabana tungod kay nagtipun-og na usab ang basura bisan bag-ohay palang sila nahuman sa ilang coastal cleanup. Matud ni Inspector Margienett Yosores, nagtuo unta silang mogamay nalang ang makuha nilang basura tulo ka semana gikan sa uwahi nilang coastal cleanup apan mas daghan na hinuon silang nakuhang basura kagahapon.

Kahinumduman nga tulo ka semana na ang nakalabay nag-coastal cleanup ang mao gihapong grupo ug napulo ka sakong mga basura ang nahipos sa kapolisan ug mga lifeguards gikan diha sa kabaybayonan sa Poblacion ug Lagundi Reef.

Matud ni Yosores kagahapon nga ang 10 ka basiyong sakong iyang gipaandam nagkuwang tungod kay mas daghang basura nga ilang nahipos diha lang sa baybayon. Nabantayan sa grupo ni Yosores nga ang kasagarang mangaligo diha sa dagat sa Talisay magpataka lang og labay sa ilang mga basura ug lakip sa mga ipanglabay dunay mga basiyo sa ilimnon  ug mga plastic.

Matud usab ni Yosores nga nagplano unta silang moirog ug pagpanglimpiyo ngadto sa laing coastal barangays apan diha pa lang sa Poblacion naglisod na sila mentinar sa kalimpyo tungod sa kawalay pagpakabana sa mga tawo diha sa maong lugar. (BANAT NEWS)