LTO: Tanang 4-wheeled vehicle kinahanglang duna nay EWD
DUMAGUETE CITY, Philippines – Higpitan na sa Land Transportation Office (LTO) sa Negros Oriental ang balaod kabahin sa pagbaton og early warning devices (EWDs) sugod sa sunod buwan subay sa memorandum gikan sa kaulohan.
Si Alberta Janine Lawas, hepe sa LTO District Office sa Bais City, Negros Oriental, miingon nga una pa ang implementasyon niini dunay “massive information and dissemination campaign†aron mahatagan og panahon ang mga motorista nga makapalit og EWDs.
Si Assistant Sec. Virginia Torres sa LTO mipagawas sa Memorandum VPT 2013-1762 nga penetsahan og May 20, 2013 bahin sa revised rules sa EWDs nga nalatid sa Republic Act 4136 o Land Transportation Act of the Philippines.
Matud pang Lawas, ang masakpang four-wheeled motor vehicle nga walay gidalang usa ka paresang EWDs mahimong dakpon sa LTO personnel ug mga deputized agents ilabi na kung dunay roadside inspections.
Ilawom sa revised rules, ang LTO district offices dili na tugotang mo-renew og mga registration o mo-rehistro og mga bag-ong sakyanan kung dili makapresentar ang tag-iya og EWDs.
Ang EWDs kinahanglang magsunod sa LTO standards and specifications ug kinahanglang ipresentar aron ma-inspeksyon ug mabutangan og LTO stickers ug may assigned serial numbers. Ang substantard nga EWDs mamahimong hinungdan nga di ma-renew o makarehistro ang sakyanan matud pang Lawas.
Ang mga EWDs susama og triyanggulo nga dunay reflectorized stickers nga ibutang sa dalan sa unahan ug sa luyong bahin sa naaberyang sakyanan aron makabantay ang ubang motorista.
Ang LTO standard EWDs dunay kolor nga orange o yellow ug black EWDs. (BANAT NEWS)
- Latest
