Ginang gipusil, gikulata, balay gisunog sa pag-umangkon

CEBU, Philippines - Usa ka ginang ang nakaikyas sa tinong kamatayon human kini gisaka sa iyang balay ug gipusil, gikulata ug giposposan pa sa iyang pag-umangkon nga misulong niadtong Huwebes sa gabii diha sa barangay Padayongan sa lungsod sa Dalaguete.

Ang biktima mao si Natividad Milan, 53, nagpuyo sa maong lugar ug usa ka mag-uuma, samtang ang suspek mao ang iyang pag-umangkon nga si Benvienido Milan, 32, nagpuyo gihapon sa maong dapit ug pagpanguma usab ang trabaho.

Matud ni SPO1 Veronico Centino, desk officer sa Dalaguete Police dihang nahinabi sa Banat News ang biktima natulog nga nag-inusara niadtong tungura dihang namat-an niini ang pagsaba-saba sa suspek nga niguba sa bongbong sa iyang balay.

Sa iyang pagpasiga sa flashlight nakit-an niini nga nagunit na og armas ang suspek ug gipusil siya niini sa walang bukton, wala pa gyud matagbaw ang suspek gisukmag niini ang iyaan sa tuong mata nga bahin ug wala pa matagbaw ang suspek gipaak pa sa suspek ang abaga sa biktima nga misuway og sukol.  Bisan samaron milugnot ang biktima ug midagan dungan sa pagpangayo og tabang sa mga silingan. Tungod sa kalagot sa suspek gisunog niini ang balay sa biktima nga ginama sa gaay ug dali ra kaayong naugdaw. Walay bisan usa nga silingan ang nisanta sa suspek tungod  sa kahadlok.

Nianang pagkabuntag na midulhog ug midangop sa kapulisan ang biktima ug pagkahuman gidala usab kini sa Cardinal Rosales Hospital sa lungsod aron patambalanan sa mga samad niini. Ang suspek wala na diha pagsusi sa kapulisan. (BANAT NEWS)