Uyoan nga nagmaoy gitabangan og dunggab sa 2 pag-umangkon patay

CEBU, Philippines - Patay ang hubog nga uyoan nga gitabangan og dunggab sa duha ka pag-umangkon niining lalaki sa sitio Paradise, barangay Looc, dakbayan sa Mandaue alas-4 pasado ang takna sa hapon sa miaging Sabado.

Ang namatay mao si Rolando Nanoy, 49, samtang ang mga suspetsado mao sila si Zaldy Nanoy, 20, ug Sonny Maranga, 24, anak sa iyang mga igsuon.

Si PO1 Melvin Pelayo sa kapolisan sa Presinto 5 sa Mandaue City Police Office (MCPO) nga nahinabi sa Banat News miingon nga hubog nga nahiuli si Rolando sa ilang panimalay ug nanghasi kini nga nagdala og pinote.

Ang mga suspek matud pang Pelayo mitug-an nga nanagana unta sila aron makalikay sa uyoan kay nagmaoy kini apan gigukod sila niini ug naapsan si Maranga ug natigbasan ang tiil niini.

Matud pa ni PO1 Pelayo nga tungod sa kalagot ni Maranga mikuha kini og kutsilyo ug gihansakan sa makadaghang higayon ang dughan sa biktima nga nakaingon sa hinanali niining kamatayon.

Human sa maong pagdunggab dali usab nga misibat pahilayo sa maong dapit ang duha ka suspetsado apan sa follow up operation nadakpan si Maranga.

Mitahan usab sa kaugalingon si Zaldy paglabay sa pipila ka oras. (BANAT NEWS)