Gov. Garcia kinadatoan sa mga opisyal
CEBU, Philippines - Si suspended governor Gwendolyn Garcia kinsa nakadaog pagka-kongresista sa tersiro distrito maoy labing dato nga opisyal sa lalawigan sa Sugbu sunod si Acting Governor ug Vice-Governor-elect Agnes Magpale. Kini subay sa ilang gitug-an sa Statement of Assets, Liabilities and Net worth (SALN) ngadto sa Office of the Ombudsman.
Base sa gisumitir nga SALN ni Garcia, ang iyang net worth misaka og usa ka milyon nga miabot tanan og P105,198,700 niadtong December 31, 2012 gikan sa P104.1 million sa nakalabay’ng tuig.
Ang net worth o ang aktwal nga kwentada sa katigayonan minus sa ilang mga liabilities o mga bayrunon.
Naglakip sa mga katigayonang gipanag-iya ni Garcia mao ang iyang mga assets nga real properties sama sa residential building, agricultural ug commercial lots sa Ormoc City.
Samtang si Magpale nabutang sa ikaduhang labing adunahang opisyal sa lalawigan sa iyang net worth nga P56,733,333 itandi sa iyang P54.9 million sa nakalabay nga tuig. Nanag-iya siya og agricultural, residential, commercial ug mixed-use inherited lots, balay sa Cebu City ug mga luna sa Danao City ug Manila.
Samtang sa Provincial Board, si 6th district board member Arleigh Sitoy maoy dunay labing taas nga net worth nga miabot og P68,737,000 (base sa iyang text sa The Freeman).
Ang presidente sa provincial Federation of the Association of Barangay Councils (ABC) ug ex-officio PB member ABC president Jose Holganza maoy labing kabus kanila sa net worth nga P150,000.
Subay sa Republic Act 3019 (Anti-Graft and Corrupt Practices Act) ug Republic Act 6713 o Code of Conduct and Ethical Standards for Public Officials and Employees, ang tanang public officials ug mga kawani kinahanglang mosumitir sa ilang SALN kada tuig. (BANAT NEWS)
- Latest
