Driver gipusil patay

CEBU, Philippines - Patay ang usa ka 36-anyos nga drayber sa traysikol human kini pusila sa wala mailhing kriminal niadtong Lunes sa buntag diha sa sitio Magay, barangay Tanke, dakbayan sa Talisay.

Ang biktima mao si Mesael Amore Rollorata, taga barangay Lagtang sa nahisgutang siyudad  kinsa nakaangkon og usa ka samad pinusilan sa likod nga bahin sa ulo wala na makaabot nga buhi ngadto sa Talisay City District Hospital.

Sila si SPO1 Rolando Bastida, PO3 Ferdinand Pablo ug PO3 Benedicto Lasque ang daling miresponde sa maong insidente.

Sa imbestigasyon sa kapolisan nga sa wala pa mahitabo ang pagpamusil si Rollorata namasada kini sa iyang inabangan nga traysikol.

Pag-abot sa biktima diha sa lugar nga nahitaboan kalit kining giduol sa wala mailhing lalaki ug sa walay pangutana gipusil kini. Si Superintendent Elmer Lim, officer-in-charge sa Talisay City Police Station nga nahinabi sa Banat News kagahapon nagkanayon nga usa sa motibong ilang gilantaw sa maong hitabo mao ang personal nga bangi.

Matud ni Lim nga nakadawat sila og report nga si Rollorata dunay nakabangi sa milabay’ng mga adlaw.

Si Lim midugang nga nagpahigayon sila og follow-up nga imbestigasyon sa maong insidente. (BANAT NEWS)