Mga sundawo nanghinlo sa barangay

CEBU, Philippines - Mokabat ngadto sa 1,000 ka mga reservist gikan sa mga reserve units ubos sa operational control sa Armed Forces of the Philippines (AFP) Central Command lakip sa mga kadete sa Reserve Officers Training Corps (ROTC) ang misalmot sa mga kalihukan kabahin sa pagpreserba sa kalikupan sa milabay’ng semana.

Sobra sa 20 ka mga barangay nganhi sa Visayas ang nakabenipisyo sa nahisgutang kalihukan nga gipahigayon sa nagkalain-laing reserve units sa Centcom.

Ang tema niini mao ang “Linis Bayanihan 1: Kalinisan at Kahandaan para sa Maayos at Ligtas na Pamayanan.”

Sa Sugbo, 50 ka mga Naval reservist uban sa mga residente, tanod ug mga lokal nga opisyal ang mipahigayon sa Linis Bayanihan diha sa barangay Tinago, dakbayan sa Sugbo.

Si Colonel George S. Fernandez, bag-ong Commanding Officer sa Naval Reserve Center for Eastern Visayas  nagkanayon nga napili nila ang  barangay Tinago tungod kay naa diha mahimutang sa maong barangay ang ilang buhatan.

Gipasabot niya nga kinahanglan nga unahon nila sa pagserbisyo ang komunidad nga naa sa ilang palibot.

Ang mga personnel ni Fernandez mipahigayon kini sa pagpanglimpiyo sa mga kanal, sapa ug kadalanan sa barangay.

Ang kapitan sa barangay Tinago nga si Domingo Lopez mipasalamat sa Naval Forces reservists sa pagpili sa ilang barangay nga usa sa mga makabenipisyo sa clean up drive.

Nunot niini, 140 ka active personnel ug reserve forces lakip na niini ang mga kadete sa ROTC sa Army reservists sa Sugbo nga gipangulohan ni Colonel Edgardo Mata ang mipahigayon sa pagpanglimpiyo sa kadalanan diha sa barangay Apas, dakbayan sa Sugbo.

Ang mga tanod, lokal nga opisyal ug mga residente sa maong barangay ang misalmot usab sa maong kalihukan.

Gawas niini, 50 ka mga reserve personnel sa Philippine Air Force ang mipahigayon usab sa pagpanglimpiyo sa kabaybayonan ug sapa diha sa barangay Tungkop ug barangay Tulay sa lungsod sa Minglanilla.

Ang mga reservist ngadto sa Negros Island, Bohol, Siquijor, Samar, Leyte ug Panay Island ang mipahigayon usab og samang kalihukan ngadto sa ilang mga komunidad.

Ang pagprotekta sa kalikupan maoy usa sa mga gilantaw sa AFP.

Si Major General Roy O. Deveraturda, AFP Central Command Commander nagkanayon kini nga samtang naningkamot sila sa pagprotekta sa katawhan gikan sa mga hulga naningkamot usab sila sa pagprotekta sa kalikupan hinungdan nga  mipasiugda sila og mga kalihukan sa pagpreserba sa kalikupan. (BANAT NEWS)