Comelec nangandam sa barangay election

CEBU, Philippines - Mopahigayon ang Commission on Elections (COMELEC)7 og imbentaryo sa mga registration forms, mga suplay ug sa mga ekipo nga gamiton alang  sa umaabot nga  Barangay   ug Sangguniang  Kabataan (SK) Elections karong Oktubre subay sa ilang nadawat nga memorandum  gikan sa ilang Central Office.

Matud ni Dominic Ian Marigomen,  Election Officer sa North District  sa dakbayan  sa Sugbo  nga  maong imbentaryo maoy  kabahin  sa   pagpangandam alang sa  rehistrasyon sa mga  bag-ong  botante para sa maong  piniliay.

Ang  gitakdang  moparehistro  mao  kadtong  mga  molupyo  nga motakdo  nga  18 anyos  ang  edad  sa adlaw  sa piniliay ug  kadtong wala  makaparehistro  sa miaging  election.

Hinuon gitataw ni Marigomen nga wala pa siya masayod kun kanus-a magsugod ang rehistrasyon alang sa umaabot nga eleksyon tungod kay wala pa usab siya makadawat sa resolution  gikan sa  Comelec Central Visayas office  kalabot  niini.

Matud  pa  ni Marigomen nga  bisan og narehistro na ang usa ka botante sa dugay na nga panahon apan duha o makadaghan na  nga  piniliay   nga wala makabotar, posible nga napapha na ang ngalan niini sa listahan sa mga botante  ug gikinahanglan nga magparehistro   siya  pag-usab   aron  makabotar  sa barangay  ug  SK election.

Samtang sa laing bahin, padayon  pang  gipaabot  sa  Comelec  ang statement  of contributions  and expenditures (SCE) sa  mga  mikandidato  sa milabayng  election  nga  wala  pa  makatunol  niini.

Suma pa ni Marigomen nga wala pay mga  kandidato  dinhi  sa siyudad nakadaug  ug  napildi  nga mihandos  na  sa ilang SCE ngadto sa  Comelec.

Matud  pa  ni  Marigomen  nga kutob  ra  sa unang  semana  sa Hunyo  ang  ilang  pagpaabot niini ug  ang  dili   makatuman,  silotan  pinaagi sa dili  pagtugot  kaniya  nga  makalansar  sa  umaabot  nga  election. (BANAT NEWS)