Mr. X miambak sa lubi bukog nangabali

CEBU, Philippines - Nabali- bali   ang  lawas  sa usa  ka  ulitawo   human  moambak  sa  lubi  nga  iyang  gikatkatan  sa atubangang bahin sa simbahan sa lungsod sa Dalaguete kagahapon sa alas 7:30 sa buntag.

Kalit lang nasurprisa ang mga tawong mitambong og misa niadtong tungora dihang mipaka ang lawas sa maong lalaki sa pagtugpa niini sa yuta gikan sa tumoy  sa lubi nga gibana- banang 25 ngadto sa 30 ka tiil ang gitas-on.

Si SPO1 Veronino Centino, desk officer sa Dalaguete Police   Station  mibutyag  sa Banat News  nga  ang  biktima  kinsa  ginganlan  lang  og  Mr.-X  kay  wala  may  nakaila  kaniya,  gibana-bana  nga  nagpangidaron  og  25 anyos ngadto sa 30 anyos,  kansang  address  walay  hisayri  sa kapolisan.

Si PO1 Christopher Romarate ug mga kaubanan nga maoy mirespondi sa  maong alarma maoy  misakwat  sa  biktima  kinsa   mihutlay  na  gumikan  sa pagkabali-bali sa  iyang   kabukogan   gumikan  sa iyang  pag-ambak.

Gihulagway  sa kapolisan  nga   nalisoan  sa maayong panghunahuna ang maong lalaki.

Ang  mga  nakasaksi  niini  mibutyag  sa kapolisan  nga  gikan  nga  naglakaw  sa karsada  ang  biktima kalit  lang  kining  mikatkat  sa layog  nga  lubi  dayon  pag-abot  didto  sa tumoy miambak  sa yuta.

 Gihatud  kini  sa  mga  molupyo  ngadto  sa  Cardinal Rosales Hospital sa  maong  lungsod   samtang gipaabot   ang  iyang  mga  kabanay nga mo-claim niini aron  ikabalhin  kini  ngadto  sa tambalanan  sa  dakbayan sa Sugbo.

Giingon  nga  dili  na makatindog  ang  biktima  kay  nangabali  ang  mga  paa, bukton  ug  ang  kabukogan  sa lawas  niini  gawas  sa  mga  samad  ug  pangos  nga  nahiagoman  sa  iyang  lawas. (BANAT NEWS)