Usa patay, duha angol sa duha ka sunog

CEBU, Philippines - Duha ka sunog ang miulbo sa managlahi nga lugar sa Sugbo ug dakbayan sa Lapulapu nga miresulta sa kamatayon sa usa ka ginang ug duha usab ang samaran.

Kagahapon sa kaadlawon gilamoy sa kalayo ang pito ka panimalay, tulo ka ukay-ukayan ug mosque sa dalan Lopez Jaena sa barangay Poblacion dakbayan sa Lapulapu.

Usa ka Avelina Tesoro nga giingong adunay sakit sa pangisip ang napaig sa sunog. Ang igsuon niyang si Susana Josep miingon nga nadunggan pa niya ang biktima nga nagsiyagit nga nagpakitabang apan wala na silay nahimo pa pagluwas kaniya.

Si SFO1 Atelano Berido, sa Lapulapu City fire department, mibutyag nga mokabat sa P750 mil  ang danyos sa maong sunog. Sagad sa naugdaw ginama sa light materials.

Matud pa ni Berido, lamparilya ang gigamit sa biktima nga gibutang sa tiilang bahin sa higdaanan niini, dako ang ilang pagtuong nasikaran nga maoy na-ingnan sa sunog.

Samtang sa dakbayan sa Sugbo miulbo usab ang dakong sunog nga miigo diha sa Carbahal St. sa barangay Guadalupe nga miresulta sa pagkaugdaw sa ancestral house n pamilyang Delaquesta nga gipaabangan.

Usa ka Arnel Villagracia ang miingon nga nakatimaho una sila og aso sa palibot ug sa paggawas nila sa ilang balay baga nga aso ang misugat kanila hinungdan nga gialerto nila ang mga silingan.

Atol sa pagpawong sa mga bombero sa kalayo nangaangol sila si SFO2 Wilfredo Ochea ug FO2 Nestor Gualiza human matagaki og debris ug natunok sa lansang.

Matud pa ni Cebu City Fire Marshall William Tacaldo nga dili hinoon kaayo grabi ang naangkong samad sa duha ka bombero.

Padayon pa ang imbestigasyon sa maong sunog kung asa ug kung unsay sinugdanan niini. Ang sunog midanyos og gibanabanang P100,000. (Bong Soriano, Romeo Limpangog ug Lesley Caminade-Vestil/EIM) (BANAT NEWS)