Kabukiran way supply sa tubig

CEBU, Philippines - Tungod sa kamahal sa tubig nga gibaligya sa mga barangay sa kabukirang bahin sa dakbayan sa Sugbo adunay mga pamilya nga mihimo’g paagi nga mabalik-balik nila paggamit ang tubig aron makadaginot.

Nakapanglingo-lingo si Rene Mercado, ang tsirman sa Metro Cebu Water District (MCWD), diha nga gisaysayan siya sa kaagi sa usa ka construction worker nga taga Sitio Fatima nga sakop sa Barangay Apas. Ang pamilya sa trabahante nga si Lalaw -- Estanislao ang tinuod nga ngalan -- mokunsumo lang og usa ka cubic meter nga tubig sa usa ka buwan.

Kini  tungod  kay  may teknik  silang  gisagop  aron makadaginot.

Si Lalaw mitug-an  sa Banat News  nga adunay koneksyon sa tubig ang mga nagpuyo sa Sitio Fatima, apil kadtong tua mahimutang sa ibabaw sa bungtod apan “sub-connection” sila sa pipila ka tawo nga mipakonektar kanila’g tubig apan mahal ang bayranan.

Ang MCWD mokolekta lang og P13.60 sa matag cubic meter nga tubig (bali’g lima ka baril kon 50 ka container o 1,000 ka litros) sa unang napulo ka cubic meter nga konsumo’s tubig.

Kun subra na sa napulo ka cubic meter nga tubig apan dili mosubra sa 20 cubic meters, tag P15 na ang bayranan, unya P17.65 ang mata’g cubic meter kun ang konsumo molapas sa 20 cubic meter apan dili molapas sa 30.

Lapas sa 30 cubic meter nga tubig, ang bayad tag P48.40 na sa matag cubic meter. Apan samtang daghan ang gimahalan na sa maong kantidad, ang mga kabus nga pamilya nga nagpuyo sa mga dapit nga wala pa maabot sa koneksyon sa MCWD napugos pagpalit og mahal nga tubig.

Apan  sila  si  Lalaw gipabayad  og  tag P75 ang matag cubic meter nga tubig nga ilang magamit,  hinungdan nga tungod sa grabeng kamahal sa tubig, daghan sa mga nagpuyo sa Upper Sitio Fatima nga kun maligo motungtong sa planggana aron ang tubig nga masawod gamiton na usab alang sa pang-flash sa pansayan ug uban pang kagamitan. (/WC) (BANAT NEWS)