Tulisan kulatado nadakpan
CEBU, Philippines - Nabulit sa bun-og ang kalawasan sa usa ka tulisan nga misuway og tulis sa usa ka burger shop sa dalan M.C. Briones sa barangay Tipolo, dakbayan sa Mandaue human kini gitabangan og kulata sa mga estambay.
Ang suspetsado nga nalandig sa tambalanan mao si Gerry Cañete, 28, lumad nga taga barangay Paknaan sa maong dakbayan.
Ang biktima nga sales lady sa burger machine mao si Jucel Panadero Laborada, 21-anyos ug kapuyo niini nga si Temoteo Gothong, 25-anyos nga nagpuyo usab sa maong dapit.
Si PO1 Frederick Andales sa kapolisan sa Presinto 2 sa Mandaue City Police Office (MCPO) nga nagbase sa barangay Subangdaku nga nahinabi sa Banat News miingon nga nagpatuo nga kustomer si Cañete pinaagi sa pagpalit unta og hamburger kang Laborada.
Dihang itunol na unta ni Laborada ang hamburger wala kini mobayad ug kalibre .38 nga armas hinuon ang gition niini ug mideklarar og tulis dayong kuha sa halin nga P857.
Si Timoteo Gothong, 25, kapuyo ni Laborada mitapi sa armas nga gition ngadto sa iyang kapuyo ug nakiglayog sa suspek samtang nangayo og tabang si Laborada sa mga estambay kinsa daling miresponde ug gitabangan og kulata si Cañete. (/EIM) (BANAT NEWS)
- Latest
