Buot mosusi sa bay ni PJ Garcia wa pasudla

CEBU, Philippines - Wala pasudla sa Guadalupe Heights Subdivision niadtong  Martes ang usa ka Roberto Letaba kinsa buot untang motan-aw sa panimalay ni Kong. Pablo John Garcia nga kandidato sa pagka-gobernador ubos sa One Cebu Party.

Si Letaba nagpakuyog sa pipila ka sakop sa media kagahapon aron unta personal nga mosusi sa balay ni Garcia kung balor ba lang kini og P10 milyones.

Sayo niini si Letaba mihangyo sa buhatan sa Ombudsman-Visayas sa pagpahigayon og lifestyle check ug sa katigayonan ni Garcia.

Apan duha ka security guard sa nahisgutang subdivision ang mibabag kang Letaba sanglit gimandoan sila sa dili pagpasulod ni bisan kinsang muadto sa balay ni Garcia.

Si Garcia wala usab sa iyang  balay sa maong  higayon sanglit nangampanya kini didto sa lungsod sa Ronda ug Moalboal.

Si Letaba nagduda sa balor sa maong  balay  human si Garcia giingong mideklarar sa kantidad nga P900 mil niadtong 2008 human siya napili isip kongresista sa unang higayon apan nahimo na nga P10.4 milyones sa 2011.

Apan si Garcia mipasabot nga ang P900 mil balor kini sa luna sa wala pay road-right-of-way (RROW) samtang ang balay natukod gikan sa P10 milyones nga huwam sa bangko.

Si Letaba mipasangil nga way kwarta si Garcia sa dili pa kini kongresista subay sa usa ka dokumento sa korte sa kaso sa iyang igsoon nga si suspendidong Gob. Gwendolyn Garcia.

Matud pa sa maong dokumento nga panalapi ang usa sa problema ni Pablo John maong naapektohan ang paglaban niini sa kaso sa iyang igsoon. Gihagit ni Garcia si Letaba nga notaryohan ang iyang mga pasangil human masuta nga mismo iyang pinuy-anan wala mabutang sa iyang suwat nga gipadangat sa buhatan sa Ombudsman.

Apan si Letaba miingon nga panumpaan niya ang iyang pasangil batok kang Garcia sa higayon nga mandoan siya sa mga imbestigador sa buhatan sa Ombudsman. (Gregg M. Rubio/WC) (BANAT NEWS)