LTO direktor miawhag sa mga drayber nga mosunod sa lagda

CEBU, Philippines - Nagmartsa patubang sa buhatan sa Land Transportation Office (LTO-7) ang mga sakop sa Nagkahiusang Driver sa Sugbo (NADSU) aron ipahigayon ang diyalogo kalabot sa ilang mga reklamo sa kadako sa multa ug uban pang mga penalty nga gipatuman sa maong buhatan.

Sa pakighinabi sa Banat News ni LTO-7 Raul Aguilos misaysay kini nga nakig-estorya kaniya ang kadagkuan sa NADSU kini aron moapelar kalabot sa taas nga multa nga gipatuman sa LTO.

Apan gipasabot ni Aguilos nga dili daling paundayonan ang ilang hangyo tungod usab kay dugay naman kining gipatuman ug eksakto lang ang silot nga gipahamtang sa LTO ngadto sa mga malapason nga nagbalik-balik na lang sa ilang mga violations.

Laing reklamo usab sa mga drayber mao ang mga manakopay nga manago ug usa nalang kini mogawas kun duna nay nalapas ang drayber.

Apan gipasabot ni Aguilos nga surpresa ang pagpanakop aron usab masayran og kun si kinsa ang mga drayber nga wala gyud magmatngon ug kadtong wala lang gyuy pagtahod sa balaod sa trapiko.

Gipasalig hinuon ni Aguilos nga kun adunay abusadong enforcers nga ireklamo ang mga drayber ug mamatud-ang sad-an dili sila magmakuli sa pagtangtang kanila gikan sa serbisyo.

Mihangyo hinuon si Aguilos sa mga drayber nga mokooperar alang sa kahapsay sa dagan sa trapiko ug walay mangadakpan.

“Hangyo nako nila nga magsubay lang unta ta sa balaod, wala may madakpan kun magsubay lang,” pasabot pa ni Aguilos. Ang silot sa LTO sa mga badlungong drayber nagbase sa gibug-aton niini, dunay suspensyon sa lisensya, dunay matiketan og temporary operator’s permit ug duna say multa.  (Lesley Caminade-Vestil/EIM)

‘Luha nga dugo’ sa  Birhen sa Fatima  ipasusi sa simbahan

Ni Marigold Lebumfacil

Usa ka church official ang nagkanayon nga mokuha sila og “specimen” gikan sa giingong “luha nga dugo” sa imahe sa Our Lady of Fatima nga gipanag-iya sa usa ka pamilya sa Sitio Kanhai, sa barangay Tisa sa siyudad sa Sugbu.

Si Monsignor Esteban Binghay, ang Episcopal Vicar sa Archdiocese of Cebu, personal nga mibisita kagahapon sa balay ni Victor Jude Rayla, ang tag-iya sa maong imahe, aron personal nga makita ang imahe.

“Whether it is genuine or not, we still need to investigate. That’s why we asked permission from the owner for us to get the specimen and without any hesitation they allowed us. Kini atong buhaton, aron walay masayop ug walay malimbungan,” matud pa ni Binghay.

“Gitan-aw nako ang imahe ug nakakita ko og streak in both of her cheeks. In order to determine, nga kini dili lang natural phenomenon ug nga kini wala na-oxidize ang statue, we really need to get a specimen,” dugang pa ni Binghay.

Kun kanus-a sila magkuha og specimen, matud ni Binghay nga makigstorya una siya ni Msgr. Antonio Medida sa San Lorenzo Parish ug ni Cebu Archbishop Jose Palma, nga atua pa sa Roma, kinsa moabot karung Abril 16. Matud ni Binghay nga ang mga debotos ug ang residente sa maong lugar nagsugod na sa paghimo og vigil ug gisugdan na pud nila ang black rosary.

Pero bisan sa kadaghan sa mga tawo nga niadto sa ilang lugar, wala gyud manawat og cash donations ang pamilya ni Rayla, kundi mga bulak lamang ug kandila nga gipang-offer sa mga deboto ngadto sa Birheng Maria.

Matud ni Binghay nga gisulod na ang imahe sa usa ka urna, aron mapreserbar sa maong imahe kay magpunay man og hikap ang mga tawo sa imahe isip parte sa ilang veneration.

“Kun makatabang ni sa mga tawo sa paglig-on sa ilang pagtuo, okay ra kini. This is just a normal phenomenon, dili ni miracle until further notice. I encouraged all the people there to continue to pray sa pagpalawom sa pagtuo aron ang kinabuhi nila lig-on ug matarong,” pulong pa ni Binghay.

Saysay pa ni Binghay nga ang mga tawo sa maong lugar nagsugod na og tawag sa maong imahe, isip Birhen sa mga Squatters, kay ilang gikonsiderar nga nagpuyo sila sa usa ka squatter’s area. Gipang-evangelize pud ni Binghay ang tanang tawo ngadto kagahapon ug gi-encourage niya ang tanan sa pagpadayon sa pag-ampo sa Holy Rosary matag adlaw aron ipakatap ang mensahe ni Mama Mary sa katawhan, nga mao ang pagbalik ngadto sa iyang anak nga si Jesus. (Marigold P. Lebumfacil/EIM)  (BANAT NEWS)