DA motumod og premium rice ngadto sa gawas

CEBU, Philippines - Gitakdang  motumod  ang Pilipinas  og  usa  ka  gatos metriko tonelada  sa premium rice ngadto  sa Hong Kong, Macau, Dubai  ug  Estados  Unidos  niining  tuiga.        Kini  ang  gibutyag ni Assistant  Secretary Dante Delima  sa Department of Agriculture (DA)  sa  iyang impormasyong  gipadangat  sa buhatan  sa DA7 dinhi  sa Sugbo.

Si Delima  kinsa  sa samang  higayon  maoy   national rice  program  coordinator nagkanayon  nga  may 50 metriko  tonelada  sa long grain aromatic white rice, black rice  ug  Jasponica brown rice  ang  gitakda  nga itumod  ngadto  sa gawas  sa nasud  niining buwan  sa Abril. Matud  pa niya  nga  adto  ihandos   sa Hong Kong  ug  Macau  ang  15 metriko toneladang black rice  gikan  sa Tiaong, Quezon, samtang  tag 20 metriko  tonelada   usab  sa brown  ug  white  Jasponica rice  nga  gikan  sa S-L Agritech Corporation.

Midugang  si Delima  nga  ang  15 ka metriko tonelada  nga long  grain  aromatic white rice adto  ihandos  sa Dubai gikan  sa rehiyon  12.

Sa pagkakaron  tag-P55  ang matag  kilo  sa black rice sa  local  nga merkado, samtang  tag-P45 usab matag  kilo ang  presyo  sa long grain aromatic rice, sumala  ni Delima.Matud niya  nga ang  itumod karong  Abril  usa  lamang  una  ka  pagsuway  gumikan  sa kadaghang   eksporte nga gitakda ,apan  ilang  gilauman  nga  mapermaninte  na  kini gumikan  sa kaanindot  og  kalidad   sa bugas  nga  i-eksporte.

Miingon  si Delima nga may 50 ka metriko tonelada  sa heirloom ug dinorado rice ang  gikontrata na  nga  ibiyahe paingon  sa  Estados  Unidos  sa ikatulong  quarter ning tuiga.  (BANAT NEWS)