‘Boy’ sa balay gi-maltrato sa agalon

CEBU, Philippines - Usa ka 20-anyos nga kanhi houseboy ang mipasaka og reklamo ngadto sa buhatan sa Investigative and Detective Management Bureau (IDM) sa Mandaue City Police Office human matud pa siya gi-maltrato ug gi-torture sa iyang amo nga babaye nga asawa sa usa ka kanhi brgy. konsehal sa Brgy.Banilad  sa siyudad sa Mandaue.

Si Joseph Gumopas, 20,  nga taga  Sitio Guintabuan  sa lungsod sa  Ubay, Bohol  ang gikuyugan ni Dr. Bernard Ibarra Lumapas, usa ka higala sa ilang pamilya aron nga mopasaka og reklamo batok sa kanhi agalon niini nga taga dan   A.S. Fortuna sa Brgy .Banilad, Mandaue city.

Tuyo nga wala pa hinganli sa Banat News ang pangalan sa maong gireklamong ginang hangtud nga di mapasaka ang pormal nga kaso.

Sa buhatan sa IDMB office, ang biktima miingon nga kanhi boy sa panimay ang mipakita sa polis sa mga uwat sa nagkadaiyang parte sa iyang lawas nga matud niya resulta sa pagmaltrato ug pag-torture kaniya.

Gipatawag unta ang ginang diha sa buhatan sa IDMB apan iyang bana niini maoy mipatim-aw ug mihimakak sa mga alegasyon batok sa iyang asawa ug mipasangil sa reklamante nga kawatan mao nga ilaha kining gipapahawa niadto pang buwan sa Disyembre.

Ang lalaki dili pa lang dugay gipasakaan og kasong direct assault ug physical injuries ngadto sa buhatan sa piskalya sa Mandaue human usab kini ug ang iyang tulo ka mga kauban ang mikulata ni PO1 Mar Expedito Villamonte diha sa may sabongan sa Mandaue Coliseum niadtong Miyerkules sa hapon.  Matud pa ni PO3 Marino Logranco, naluoy si Dr. Lumapas kang Gumopas tungod sa  nahiaguman niini. Ang maong doktor maoy nitambal kaniya sukad sa pag-abot niini sa nakalabay nga semana didto sa Ubay.

Sumala pa ni Logranco si Lumapas miingon nga bisan pipila na ka bulan ang nakalabay, wala pa gihapon hingpit nga naalim ang kadaot sa lawas bunga sa giingong pagmartilyo, pagsamad ug pagbunal og palo-palo sa agalon ngadto sa pasyente niini.

Sa pagkakaron, hasta ang bugan ug pribadong bahin sa lawas ni Gumopas pabilin pang naghubag tungod sa pagmaltrato.

Ang reklamante miingon nga milayas siya sa balay sa mga agalon kay di na niya maagwanta apan ning Mahal nga Adlaw ra siya nakaabot sa ilaha tungod kay kuwang ang iyang pamelete.  (BANAT NEWS)