Soco labing miisog sa iyang kampanya

CEBU, Philippines -  Labing  miisog  si  vice  gubernatorial  candidate  Glenn  Soco  sa  iyang  pangampanya  karon human  masuta  niya  nga  naglayag  siya  sa kadaogan.

Gikan  niadtong  Domingo  sa  iyang  pagsuroy  sa nagkalainlaing  suok  sa Mandaue City  nga  maoy  iyang  balwarte,  iyang  giduaw  ang  dakbayan  sa Danao  nga  balwarte  usab  sa duha  ka  mga  tang-an  nga  mga  politiko  nga  maoy  iyang higpit  nga  mga  kaatbang  sa   sambunot  politikanhon  sa  bugnong  lugaynon  karong   Mayo 13.

Wa siya  makontento,  giduaw  niya  mismo  ang   buhatan  ni  acting  governor  Agnes  Magpale  sa  Kapitolyo  ug  gipangulitawhan  niya  ang  mga  kawani  sa nagkalainlaing   departamento  sa Kapitolyo  sa  pamasin  nga  makakuha  siya  og  daghang  botos  kanila.

Ang  Danao  city  maoy  pinuy-anan  ni  acting  governor  Magpale kinsa  maoy  kandidato  pagka-bise  gobernador  sa Liberal  Party,  ug  ni  vice gubernatorial  candidate  Durano  sa One  Cebu Party.

Nasud-ong  sa batan-ong  magpapatigayong  Soco  ang    kamainiton  sa  mga katawhan  sa Danao  nga  miabi-abi  kaniya   nga  nagpasabot  sa dako  nilang  kaikag  sa pagsuporta  sa iyang  kandidatora  sa umaabot  nga  piniliay.

Bisan  sa Kapitolyo  nabatyagan  ni Soco  ang  kainit  sa  mga lamano  sa mga kawani  niini  nga  mipasabot  sa ilang  kahidlaw  nga  makita  siya  ug  mipasabot  sa ilang  pagpaluyo  kaniya.

Nalukoplukop na  ni  Soco  ang  pagpanuaw  sa  mga kalungsoran  sa habagatan  ug  amihanang  bahin  sa lalawigan  lakip  na  ngadto  sa isla  sa Camotes  diin  ang  panon  sa kaliboan  ka  mga batan-on, hamtong  ug  mga senior citizens  nga  nagpakita  sa ilang  kamainiton  sa  pagdawat  kaniya  labing nakapasibot  sa iyang  galamhan  ug kasingkasing  nga  sa umaabot  nga  eleksyon dako  ang  iyang  purohan  nga  mahimong  mananaug  sa  pagka-bise  gobernador  sa lalawigan  sa Sugbo. (BANAT NEWS)