2 kalabira nasangit sa pukot

CEBU, Philippines - Duha ka kalabira sa tawo nga gisulod og pukot ang napalgan sa sapa-sapa sa Sityo Tabok sa barangay Lamak sa lungsod sa Liloan niadtong Domingo sa alas 2:30 sa hapon.

Usa ka Hipolito Jocotmaya, 61, molupyo sa maong lugar ang nakadiskubre sa maong mga bukog sa tawo nga giputos og fish net.

Matud ni PO3 Jason Gayo sa Liloan Police dihang nahinabi sa Banat News dili na mailhan ang mga bukog ug nagkabuwag-buwag na kini.

Subay sa imbestigasyon, nanaod og bingwit si Jokotmaya sa maong dapit dihang sa iyang pagwahing sa usa sa mga katangkongan nasindolan niini ang maong pukot. Tungod niini, iyaha kining gipasaka ug nakugang nalang siya nga mga  bukog sa tawo ang nangasangit niini.

Dali niya kining gi-report sa kapulisan ug sa gihimong pakisusi nasuta nga bukog sa duha ka tawo ang maong kalabira nga giusa og sulod sa fish net ug gilabay lang sa maong lugar.

Gituohan sa kapulisan nga bag-ohay pa kining gilabay sanglit bag-o paman kaayo ang gisudlan niini. Nagduda usab sila nga dili residente sa maong dapit ang duha tungod kay walay na-blotter kanila nga na-missing sa nanglabay nga mga adlaw.         

  Ang maong mga bukog gidala na ngadto sa PNP Crime Lab aron masuta kun kini babaye o lalaki ba o tigulang o mga batan-on pa ug kung unsay gikamatyan sa duha. (/EIM) (BANAT NEWS)