Kalamposan sa 4Ps gitataw

CEBU, Philippines - Malampuson ang giimplementar nga programa sa goberno nga Pantawid Pamilyang Pilipino Program (4Ps) tungod kay nakatabang gayud kini sa pagpalambo sa kahimtang sa pamilyang kabus dinhi  sa nasud.

Sumala pa ni Socioeconomic Planning Secretary Arsenio M. Baliscan, ang mga pamilyang nakapahimulos sa 4Ps o conditional cash transfer madasigon nga nagtuman sa mga programa sa edukasyon ug maayong panglawas kung itandi sa wala pa makabenepisyo niini.

Dugang pa ni Baliscan usa  sa  kalampusan  sa 4Ps  mao  ang  kadaghang  mga  kabataan  nga  anak  sa  mga  kabus  nga ginikanan  nga  nakatungha  sa eskuylahan karon. 

Nasuta nga labaw sa 10 porsento ang insurance coverage nila sa PhilHealth ug maternal benefits sa mga nagsabak nga mga kababayen-an ug nga mas taas usab ang enrollment rate sa mga Day Care Center ug basic education program sa mga bata nga nagpanuigon og 3 hangtod 5 anyos ug 6 hangtod 11 anyos  nga  kabataan.

Daan na nga gipasabot ni Aileen P. Lariba, ang tigpamaba sa Department of Social Welfare and Development (DSWD-7) nga ang 4Ps nga programa nakahatag og oportunidad nga makabaton og de kalidad nga trabaho ang mga membro niini.

Gibutyag ni Lariba nga mao na kini ang timailhan  nga labi  pang  modaghan  ang  matabangan  ning  maong  programa  sa umaabot  nga  mga  adlaw. (BANAT NEWS)