Pangilad sa usa ka tindahan gisumbong

CEBU, Philippines - Sa ikaduhang higayon gireklamo na usab ang usa ka kompanya nga mamiktima sa mga credit card holders nga walay pagtugot sa tag-iya.

Niadtong petsa 6 Miyerkules usa ka HR manager sa MEPZ  nga si Aseneth Ouano ang mireklamo human siya  padalhi og  bank statement kalabot sa pagkuha og P56 mil nga kantidad gikan sa iyang credit card.

Sa iyang pagsubay nahibaw-an niyang gikuha kini sa maong kompanya nga maayo kaayong mipasalig kaniya nga makadaog siya og raffle ug ang ila lang tan-awon ang iyang credit card.

Apan inay motagam lain na usab nga biktima ang nagpatabang sa City Intelligence Branch (CIB) human kini siya nailad usab sa maong kompanya.

Matud pa ni Adelaida Zarate nga susama gyud sa gihimo sa mga sales representative sa maong kompanya ngadto sa mga unang biktima ang gibuhat nila kaniya.

Matud pa niya nagduda siyang gisekreto og swipe sa mga empleyado ang iyang credit card samtang siya giatiman og maayo sa uban diha sa massage chair samtang gipaabot ang papel bahin daw sa ilang ipa-raffle sama sa kitchen wares; ang massage chair ug uban pa.

Tuod man nidaog siya apan wala siya magdahom nga gibayran diay kadto gamit ang iyang credit card nga unta gipasalig man kaniya nga free of charge kini.

Si Zarate nagpatabang sa CIB pinanguluhan ni Chief Insp. Romeo Santander kinsa mipasaka og kasong estafa in relation to RA 8484 o Access Device law.

Nanawagan si Santander sa uban pang mga posibleng nabiktima sa maong kompanya.  (BANAT NEWS)