Schedule sa trabaho sa MM Bridge ipahibawo sa publiko

CEBU, Philippines - Gitakdang   ipresentar  sa Department  of Public  Works  and Highways (DPWH) ang mga schedule sa adlaw ug oras sa pagtrabaho sa 1st  Mactan Mandaue Bridge ug Marcelo Fernan Bridge  ngadto sa publiko  ug  sa  mga opisyal sa kagamhanan sa dakbayan sa Mandaue, dakbayan sa Lapulapu ug uban pa.

Kini ang gipadayag ni Engineer Renault Ricardo sa buhatan sa DPWH nga nahinabi sa mga tigbalita.

Ang pagpresentar sa oras ug mga adlaw sa ilang  pagtrabaho  sa duha ka taytayan  gikinahanglan  kaayo  ug ila  kining himoon human  sa tigom sa mga sakop sa Metro Cebu Bridge Management Board.

Dugang pa niya nga niadtong miaging semana  nahingpit   na  ang pagpang-aspalto sa 1st  Mactan Mandaue Bridge ug ang kasamtangan nilang gitibawas sa pagtrabaho   mao  ang pagtangtang sa ilang gipangbabag nga mga kahoy sa agianan.

Gitataw ni Engineer Ricardo nga ang pag-ilis  sa mga expansion joints sa duha ka taytayan ila  na  usab  nga  gihimo  aron  kalikayan  ang   makuyaw  ug peligro  unya  nga  panghitabo.

Dugang pa niya nga  ilang paningkamutan nga   sa panahon sa pag-aspalto sa Marcelo  Fernan Bridge dili  mabalda ang dagan sa mga sakyanan aron kalikayan ang kalangan sa biyahe sa mga sumasakay paingon  sa  Lapulapu  ug  pabalik  sa  Mandaue. (BANAT NEWS)