Tulo ka fire trucks gikan sa DILG ihatag dinhi sa Sugbu

CEBU, Philippines - Dugang tulo ka fire trucks ang gipaabot nga madugang sa kabomberohan dinhi sa Sugbo nga ihatag gikan sa Department of the Interior and Local Government (DILG) ugmang adlawa.

Apil nga makaangkon og bag-ong fire truck mao ang Cebu City Fire Station nga ihatag mismo ni DILG Secretary Manuel “Mar” Roxas atol sa kalihukan nga ipahigayon adto sa Camp Crame.

Si Mayor Michael Rama gidapit ni Chief Superintendent Carlito Romero, acting director sa Bureau of Fire Protection (BFP) sa nasud nga motambong sa turn-over ceremony.

Sa programa adto sa Camp Crame ugmang adlawa, gikatakda nga ipakita sa kabomberohan ang kapabilidad sa mao nga fire truck nga Rosenbauer TLF 4000.

Matud ni City Administrator Jose Marie Poblete nga giawhag nila si Engr. Jose Ma. Eugene Elizalde nga maoy presiding officer sa Police Coordinating Advisory Council (PCAC) nga maoy mo-representar ni Rama sa maong kalihukan.

Sa Sugbo, apil nga makadawat og tagsa ka bag-ong fire truck mao ang kabomberohan sa Talisay, Lapulapu ug Mandaue. Sa Negros Oriental ang hatagan mao ang dakbayan sa Bayawan ug Tanjay.

Ang DILG mitagana og 38 ka bag-ong fire trucks nga ipanghatag sa lainlaing local government units karong tuiga.

Dinhi sa Sugbo, daghan pa nga mga lungsod nga wala pay fire trucks. (Rene U. Borromeo/EIM)

 9 anyos natapsingan  sa pick-up

Ni Darrel Carumba

Nakasinati  og  bun-og  sa lawas   ang usa  ka bata  human  kini  dasmagi sa usa  ka  pick-up  didto  sa  barangay  Looc,  lungsod sa Oslob,  kagahapon  sa udto.

Ang biktima mao si Clint Kim Basco Romanillos, 9, nagpuyo sa maong lugar ug tinun-an sa Grade 3 .

Samtang ang nakadasmag kaniya mao ang Nissan pick- up nga gimaneho   ni  JunJun Colinares, 32,  minyo nagpuyo sa Gil Tudtud st., barangay Mabolo siyudad sa Sugbo.

Si SPO1 Job Sarveda sa Oslob Police Station  mibutyag  sa Banat News nga   bag-ong nanaug  ang biktima  sa  traysikol  nga gisakyan  niini  gikan  sa eskuylahan  dihang  sa  iyang  paglabang  sa karsada  mao  usay  pag-agi  sa pick-up  nga  nagsunod  sa iyang  gisakyan  ug  nadagit  siya  niini.

Gihatud  dayon  kini  ngadto  sa Oslob District Hospital apan gi-transfer   usab  ngadto  sa  Vicente Sotto Memorial Medical Center (VSMMC)  sa dakbayan sa Sugbo .

Samtang ang   suspetsadong drayber  sa sakyanang  nakadasmag   gidakop dayon sa kapolisan apan  nakig-areglo  kini  sa mga  ginikanan sa   biktima.  (BANAT NEWS)