Barkong nalunod ipa-chop chop aron mahaw-as gikan sa dagat

CEBU, Philippines -  Putol-putolon ang barko nga nalunod sa kadagatan sa Brgy. Canjulao sa dakbayan sa Lapulapu aron kini makuha ug malikayan ang disgrasya sa kadagatan.

Kini maoy giluwatang pamahayag ni Andy Berame, ang Coastal Enforcement Coordinator sa dakbayan sa Lapulapu nga gitahasan sa pag-monitor sa barkong B&E 1 nga nalunod uban sa 23 mil ka sakong semento sa milabay’ng tuig.

Matud pa ni Berame gumikan sa dili maayong kahimtang sa panahon hangtod karon wala pa makuha ug mapalutaw og balik ang maong barko sud na sa pito ka bulan gikan sa pagkalunod.

Bisan pa nga nakuha na ang mga sinakong semento ug ang lana sa maong barko maisip gihapon kini nga risgo alang sa ubang mga barko.

Sa ulahing pakisusi ni Berame, ang barko mitakilid na gumikan sa paglihok sa dagat ug nalubong sa lapok sa maong dapit ug lisod nang kuhaon.

Ang Omega Steel and Marine Services nga maoy mo-“salvage” sa maong barko misugyot ngadto sa tag-iya sa B&E 1 nga si Benjamin Yu nga ila na lang putolputolon ang parte sa maong barko aron mahaw-as kini sa dagat.

Si Lapulapu City Mayor Paz Radaza sa iyang bahin makig-alayon sa Philippine Coast Guard ug sa tag-iya sa maong barko sa maong lakang nga pagchop-chop sa barko.

Nanghinaut si Mayor Radaza nga sa sunod bulan sa Marso makuha na ang maong barko aron malikayan ang disgrasya sa kadagatan.

Ang maong barko nalunod niadtong Hulyo tuig 2012 tungod sa kusog nga balod ug hangin, naluwas hinuon ang tanang tripulante niini. (BANAT NEWS)