Politikong Lay Ministers giawhag sa pagbakasyon

CEBU, Philippines - Gitambagan ni Archdiose Episcopal Vicar Monsignor Esteban Binghay ang mga lay ministers nga gustong modagan sa election karung Mayo nga mobakasyon una sa pagserbisyo sa simbahan hangtud mahuman ang campaign ug election period. Matud ni Binghay gibuhat kini aron dili magamit ang simbahan sa propaganda o publisidad sa mga politikong lay ministers.

Gawas niini, gi-discourage usab ang mga politiko sa pagsalmot sa pagtuki sa mga pulong sa Ginoo atol sa "Siete Palabras", nga maoy usa sa mga highlights sa Holy Week nga madungog sa mga radio ug makita sa television.

"Ang Siete Palabras, usa kini ka religious activity, maong gi-discourage pud namo ang mga kandidato sa pagtuki sa pulong sa Ginoo para walay unfair competition sa uban for publicity," matud ni Binghay.

"Ang paggamit sa mga butang sa relihiyon ug mga tinuohan ilabi na sa Kuwarisma ug pag-ampo, sa mga buhat sa kalooy, dili sakyan sa personal nga interes kay sa Diyos kini, kinahanglan gamiton kini alang sa kalambuan sa tawo," dugang ni Binghay.

Wala hinuon gidid-an ang mga politiko nga magpa-misa hangtud sa eleksyon, apan kinahanglang makontrol sa mga kura paroko nga di magamit ang kalihokan sa simbahan pabor sa usa ka politiko.

"Wala sila did-i sa pagpamisa. Apan ang ilang mga ngalan naa permanente sa mga misa sa tanang parokya sa ilang distrito o lungsod, ang Ginoo na lang ang mahibalo ana," dugang pa ni Binghay.

Giawhag usab ni Binghay ang mga politiko nga mangumpisal ilabi na karong Semana Santa. (BANAT NEWS)