Nasunog nga lugar sa Capitol Site delikado sa mga nagpuyo–City BFP

CEBU, Philippines - Miulbo ang usa ka dakong sunog diha sa Purok Sto.Niño sa dalan B. Rodriguez barangay Capitol Site pasado alas- 9 sa buntag kagahapon. Tulo ka tawo nangapaso.

Matud pa ni Cebu City Fire Department Fire Marshall William Tacaldo nga nahinabi sa Banat News nga  hagip-ot ang dalan ug may mga sakyanang gi-parking sa dalan maong naglisod og sulod ang mga dagkong fire trucks.

Nabantayan usab ni Pacaldo nga dead-end ang unahan sa maong dalan nga nakapasamot sa peligro alang sa mga nagpuyo.

“We are appealing also all barangay officials unta tabangan nila ang ilang lugar…suggestion lang namo og mahimo atong likayan kanang mga naay dead-end nga agianan. For example dead-end na unya ang kalayo tua sa karsada dapit kun asa pud unta ka makagawas unya layo kaayo ang travel sa karsada asa man sila mo-agi? Mao nay maka cause ug trap gud, so delikado kaayo sa mga tawo,” pasabot pa ni Tacaldo.

Ang maong sunog giingong naggikan sa panimalay nilang Marife ug Vicente David  nga daling giisa ngadto sa Task Force Alpha.

Sa pasiunang imbestigasyon sa kabomberohan nasayran nga ang anak sa magtiayong David nga si Jamaica maoy unang nakakita nga nag-aso na ang ilang lawak sa ikaduhang andana sa ilang panimalay.

 Gibana-banang onse ka mga panimalay ang gilamoy sa kalayo ug adunay kapin kun kulang 20 usab ka mga pamilya ang naapektuhan.  Gisuta pa sa kabomberohan ang hinungdan sa maong sunog.

Samtang ang kapitan sa Capitol Site nga si Manuel Guanzon, mibutyag usab nga iya nang gitagana ang sports complex sa barangay aron temporaryong kapasilongan sa mga nabiktima.

Sa laing bahin naugdaw ang day care center sa dalan F.  Tumulak sa barangay Gun-ob dakbayan sa Lapulapu alas 6:19  ang takna sa miaging gabii.

Nagsugod sa usa sa lawak sa ikaduhang andana ang kalayo. Matud pa ni FO3 Timoteo  Vallor, imbestigador sa kabomberohan sa maong dakbayan nga nahinabi sa Banat News  nga ang wala maibot nga plug sa refrigerator nga nag-overheat ang sinugdanan sa sunog.

Gibanabanang mokabat sa P150,000 ang danyos sa nasunog nga mga butang.  (BANAT NEWS)