Mama, anak ug pag-umangkon sikop sa buybust
CEBU, Philippines - Usa ka ginang nga gidudahang usa ka level 2 drug pusher kuyog sa iyang anak ug usa ka pag-umangkon ang nasikop atol sa usa ka buy-bust operation nga gipahigayon sa kapolisan sa Mactan Police Station.
Arestado sila si Editha Bahio, 52, iyang anak nga si Pegy Bahio, 32, ug iyang pag-umangkon nga si Anthony Nunez, 36, human gipahigayon ang buy-bust operation sa kapolisan sa ilang panimay sa barangay Mactan.
Nasayran gikan ni Mactan police station chief, Chief Insp. Conrado Manatad nga napahigayun ang buy-bust operation human siya makadawat og forwarded text message gikan ni LLCPO director Sr. Supt. Rey Lyndon Lawas kalabot sa illegal nga kalihukan sa nahisgutang inahan ug anak. Si Manatad nagkanayon nga mipahigayun gilayon sila og duha ka semana nga surveillance ug human nagpositibo ang surveillance gihimo dayon ang buy-bust operation.
Matud pa si Pegy maoy nidawat sa P300 nga marked money ug gihatag gilayon niini ang maong kantidad ngadto sa iyang inahan.
Gisikop usab ang pag-umangkon nga si Nunez tungod sa duha ka paketeng shabu nga nakuha gikan kaniya samtang kini padung sa luyong bahin sa balay nga dunay payag nga gihimong suyopanan.
Nakuha sa kapolisan ang buybust money, usa ka medium nga paketeng shabu ug listahan sa dagkong pakete nga shabu nga na-dispose gikan sa kamot ni Editha samtang gagmay’ng pakete nga shabu ang nakuha usab kang Pegy ug laing duha ka gagmay’ng shabu ang nakuha usab sa kamot ni Nunez.
Si Editha kusganong mihimakak nga usa siya ka level 2 pusher sanglit namorsiyento lang siya matud pa ug igo lamang modawat og tag P20 matag gagmay’ng pakete nga mahalin. (BANAT NEWS)
- Latest
