Unibersidad miapelar sa publiko pagpasa sa sex video ipahunong
CEBU, Philippines - Miapelar karon ang tigpamaba sa usa ka unibersidad ngadto sa publiko ilabi na sa mga tawong napasahan o dunay kopya sa sex video nga nag-ingong ilang tinun-an ang babaye nabutang sa maong eskandalo sa pag-delete o ba kaha paghunong na sa pagpasa-pasa niini.
Matud pa sa tigpamaba sa maong tunghaan nga gikahinabi sa The Freeman (igsuong pamantalaan sa Banat News) ang maong sex video nga mikatap karon sa internet nahitabo duha ka tuig na ang nakalabay ug dili na konektado sa ilang unibersidad ang maong tinun-an nga nagsuot pa og uniporme ug ID.
Dugang pa sa tigpamaba nga usa ka pribadong buhat ang gihimo sa maong tinun-an ug sa uyab niini nga dili tinun-an sa ilang unibersidad. Giklaro usab niya nga wala kini mahitabo sa sulod sa ilang tunghaan ug usa lang kini ka isolated case.
Giklaro usab niya nga wala kini mag-reflect sa identity sa ilang unibersidad.
Giawhag niya ang publiko nga angay kaluy-an ang maong tinun-an tungod kay nagtuo ang unibersidad nga grabe ang pag-antos karon niini sa nahitabo. Matud pa niya nga dihang nikatap na kini sa internet nasayod na sila nga dili gyud kini makontrol sa pagkuyanap bunga sa ka-moderno karon sa teknolohiya.
“Let’s pity the girl. Let’s not be irresponsible,†matud pa niini nga tuyong wala hinganli sa Banat News aron panalipdan ang integridad sa maong unibersidad.
Gihulagway niya nga iresponsable ang tawo mi-upload sa maong video nga gipistahan karon sa mga netizens. Hinuon dili tanang nakakita sa maong video ang nalipay o nakauyon sa gidangatan sa maong babaye.
Dunay misaway sa gibuhat sa nag-upload ug sa nagpasa-pasa niini. Samtang daghan ang nalooy. Apan wala kalikayi nga ang pipila ka mga alumni sa maong tunghaan ang wala makapugong sa ilang kasuko sa gibuhat sa maong babaye nga nagsuot sa ilang uniporme.
Duna nay imbestigasyon nga gihimo pagsubay si kinsa ang mi-upload sa maong video.
Samtang gimandoan sa kadagkoan sa maong unibersidad ang mga magtutudlo nga ilansang sa alimpatakan sa ilang mga tinun-an nga ang binuhatan sa usa dili sala sa tanan. Giplanohan usab karon nga dugangan o ba kaha hingusgan pa ang leksyon bahin sa moralidad diha sa ilang mga curriculum.
Masaligon hinuon siya nga mamatay ra sa natural nga paagi ang maong eskandalo sa dili madugay apan sa pagkakaron nakasabot siyang daghan ang manguryuso bahin niini.
Sumala pa niya matabunan ra unya ang eskandalo tungod sa umaabot nga eleksyon. (BANAT NEWS)
- Latest
